75% Dana telja árás líklega

Fleiri Danir óttast að hryðjuverkaárás verði gerð í Danmörku en áður, samkvæmt nýrri skoðanakönnun. Þrír af hverjum fjórum telja líklegt að Danmörk verði fyrir árás á næstu árum. Helmingur þjóðarinnar styður enn stríðið í Írak. Gallup gerði skoðanakönnun fyrir dagblaðið Berlingske Tidende og var úrtakið þúsund manns. 75% telja líklegt eða mjög líklegt að öfgafullir múslimar framkvæmi hryðjuverk í Danmörku á næstu árum. Það eru mun fleiri en í sams konar könnun fyrir tæpu ári þegar 52% Dana óttuðust hryðjuverk. Meirihluti nefnir London sem ástæðu fyrir auknum ótta. Helmingur þjóðarinnar telur hættuna hafa aukist eftir opinbera heimsókn George Bush, forseta Bandaríkjanna, í síðustu viku. Stuðningur við Íraksstríðið er hins vegar næstum óbreyttur en um annar hver Dani telur það hafa verið rétta ákvörðun að hafa sent danska hermenn í stríð til Íraks. Fræðimaður við danska stofnun í alþjóðamálum segir við Berlingske Tidende í dag að könnunin sýni þrjósku dönsku þjóðarinnar og að niðurstaðan sé endurómun orða stjórnmálamanna í Danmörku sem hafi sagt aftur og aftur að ef danskir hermenn hverfi frá Írak sigri hryðjuverkamennirnir. Peter Viggo Jakobsen metur það þannig að raunveruleg ógn sé ekki meiri nú en áður, þrátt fyrir að Dönum hafi verið hótað í bréfi Evrópudeildar Al-Qaida sem birt var eftir árásirnar í London. Eftir að Nörreport-lestarstöðin var rýmd á dögunum vegna grunsamlegs bakpoka, sem reyndist bara innihalda dagblöð, var torgið við Amalíuborgarhöll girt af um stund í gær meðan sprengjusérfræðingar könnuðu yfirgefna svarta ferðatösku. Taskan, sem var sundurskotin eftir aðgerðirnar, reyndist hins vegar aðeins innihalda nauðsynlegan útbúnað ferðamanns; föt, greiðu, tannbursta og tannkrem.