Evrópusambandið verður að breytast

Tony Blair, forsætisráðherra Bretlands, brýndi fyrir Evrópuþingmönnum í gær nauðsyn þess að Evrópusambandið tæki róttækum breytingum, ella myndi það líða undir lok. Bretar taka við forsæti ráðherraráðs Evrópusambandsins um mánaðamótin en í gær kynnti Blair fulltrúum á Evrópuþinginu áherslur ríkisstjórnar sinnar í þessum efnum. Hann sagði að sambandið yrði að taka róttækum breytingum ef það ætti ekki að bregðast tilgangi sínum fullkomlega. "Aðeins með breytingum getur sambandið náð sínum fyrri styrk, hlutverki og hugsjónum." Blair sagði ennfremur að svo virtist sem aðildarríkin gerðu sér ekki fulla grein fyrir samkeppninni sem að þeim steðjaði frá ríkjum á borð við Kína og Indland, ESB gæti ekki barist gegn hnattvæðingunni heldur yrði það að taka þátt í henni af fullum krafti. Jean-Claude Juncker, forsætisráðherra Lúxemborgar og fráfarandi forseti leiðtogaráðs ESB, hefur kennt Blair um að engin sátt hafi náðst um fjárlög sambandsins næstu árin. Blair vísaði hins vegar þeim ásökunum á bug í gær en sagði að það væri einfaldlega of seint að bíða til ársins 2014 með að endurskoða landbúnaðarstefnu ESB. Í dag renna um 40 prósent útgjalda sambandsins í þann málaflokk.