Vildi deyja í haldi mannræningja

Svíinn Ulf Hjertström sem er á sjötugsaldri lenti í klóm mannræningja í Írak og var haldið í tvo mánuði. Hann segir lífsreynsluna hafa verið ömurlega og vildi helst deyja meðan hann var í gíslingu. Ulf Hjertström, sem er 63 ára, starfaði við olíuviðskipti í Bagdad í Írak þegar mannræningjar rændu honum í borginni 25. mars síðastliðinn. Hann var í haldi þeirra þar til 30. maí síðastliðinn. Hjertström telur víst að honum hafi verið rænt af fjárhagslegum ástæðum og hann er viss um að lausnargjald hafi verið greitt fyrir hann. Eftir að mannræningjarnir slepptu honum var hann fluttur til Kúveits þar sem sænskir embættismenn tóku á móti honum og þaðan var hann fluttur til Svíþjóðar. Hjertström segir um atburðina að hann viti ekki hvað hafi gerst. Hann gruni að mannræningjarnir hafi notað einhvers konar gas við ránið. Þegar hann hafi vaknað hafi einn mannræningjanna setið ofan á honum, miðað byssu á milli augnanna á honum og leitað í vösum hans. Hann segir enn fremur að fyrstu tíu dagana hafi ræningjarnir komið inn, látið hann setja hendurnar á vegginn og svo skotið af byssu við eyrað á honum. Þetta hafi þeim fundist fyndið. Hjertström segir að menn deyi hið innra á vissan hátt við slíkt. Eftir tvö til þrjú skipti sé maður andlega dauður og standi á sama og hugsi: „Látum þá skjóta.“