Sænskur gísl frelsaður í Írak

Sænskur gísl sem verið hefur í haldi mannræningja í Írak í rúma tvo mánuði hefur verið frelsaður. Frá þessu greindi utanríkisráðuneyti Svíþjóðar í dag. Ekki hafði verið greint frá því að manninum, hinum 63 ára Ulf Hjertström, hefði verið rænt en hann segist í samtali við Aftonbladet hafa verið í haldi frá því á föstudaginn langa. Hjertström, sem búið hafði einn í Bagdad í 14 ár, segir að sér hafi verið haldið í kjallara húss í borginni og í prísundinni hafi hann séð átta gísla tekna af lífi. Aftonbladet greinir frá því að sænsk yfirvöld hafi fengið að vita að hann væri í haldi uppreisnarmanna um hálfum mánuði eftir að honum var rænt og hófust þá samningaviðræður við mannræningjana. Þær sigldu hins vegar í strand og því báðu sænsk stjórnvöld leyniþjónustu Breta að taka við málinu sem hún og gerði. Hjertström var svo frelsaður 30. maí síðastliðinn og er nú kominn til Svíþjóðar.