Erfiðir tímar hjá ESB

Evrópusambandið er komið í einhverja verstu tilvistarkreppu sögu sinnar eftir að leiðtogafundur sambandsins í Brussel fór gjörsamlega út um þúfur. Hvorki náðist sátt um fjárlög sambandsins né það hvernig bjarga mætti stjórnarskrársáttmálanum. Fundir stóðu linnulaust yfir alla fyrrinótt hjá leiðtogunum en þegar eldaði af degi var ljóst að ekkert hafði miðað áfram í samkomulagsátt. Menn gerðu litla tilraun til að leyna gremju sinni og vonbrigðum. Jean Claude Juncker, forsætisráðherra Lúxemborgar sem situr í forsæti ráðherraráðs ESB til mánaðarloka, ræddi við blaðamenn áður en hann hélt til Bandaríkjanna og Kanada til viðræðna við þarlenda ráðamenn. "Nú fer ég vestur um haf þar sem ég fæ þann heiður að kynna þeim hversu samhent og öflug Evrópa er á alþjóðavettvangi," sagði hann í hæðnistón. Hann bætti því við að á næstu vikum myndu embættismenn greina frá því að ESB "væri ekki í kreppu heldur í mjög alvarlegri kreppu." "Þetta eru einhverjir mestu erfiðleikar sem Evrópusambandið hefur komist í," sagði Gerhard Schröder Þýskalandskanslari eftir fundinn í gær. Í svipaðan streng tók Dominic de Villepin, forsætisráðherra Frakklands, sem sagði á fundi í París, að nú stæðu yfir erfiðustu tímar í sögu sambandsins. Mestur tími leiðtoganna fór í að skattyrðast um fjárlög sambandsins fyrir árin 2007-2013. Bretar hafa ekki viljað gefa eftir afslátt sinn af fjárlögunum nema að heildarendurskoðun á landbúnaðarstefnu sambandsins fari fram en það hafa Frakkar og Þjóðverjar ekki tekið í mál. Jack Straw, utanríkisráðherra Bretlands, varaði við að Evrópusambandið festist í fortíðinni og sagði að minnsta kosti fjórar aðrar þjóðir styðja Breta. Jafnframt hafði verið áformað að ræða um mögulegar björgunaraðgerðir á stjórnarskrársáttmálanum en engar tillögur voru samþykktar í þeim efnum. Bretar taka við formennsku í ráðherraráðinu 1. júlí og aðspurður hvort Tony Blair, forsætisráðherra Breta, myndi ná að höggva á hnútinn í formennskutíð sinni sagði Juncker einfaldlega nei.