Segir bin Laden ekki í Afganistan

Sendiherra Bandaríkjanna í Afganistan, Zalmay Khalilzad, fullyrti í gær að hvorki Osama bin Laden né fyrrverandi talibanaleiðtoginn Mullah Omar væru í landinu. Khalilzad var með þessu að bregðast við fullyrðingum samherja þeirra bin Ladens og Omars, sem fram komu í sjónvarpsviðtali í Pakistan, um að þeir væru í fullu fjöri og Omar stýrði enn skæruliðum í Afganistan. Á blaðamannafundi í Kabúl varði Khalilzad að enn hefði ekki tekist að hafa hendur í hári bin Ladens. "Það er ekki auðvelt verkefni að hafa uppi á einni manneskju á stóru landsvæði. Það krefst góðra njósna."