Ástralskur gísl frelsaður

Íraskir og bandarískir hermenn frelsuðu í gær ástralskan gísl sem hafði verið í haldi mannræningja í 47 daga. Þá fórust tugir Íraka í sjálfsmorðssprengjutilræðum. Douglas Wood, 64 ára ástralskur verkfræðingur, þakkaði íröskum hermönnum fyrir aðstoðina við frelsun sína úr höndum uppreisnarmanna sem héldu honum föngnum í húsi í vesturhluta Bagdad. Ástralíustjórn hafði neitað að verða við kröfu mannræningjanna um að kalla heim þá 1.400 áströlsku hermenn sem eru í fjölþjóðlega setuliðinu í Írak. Nick Warner, sem stýrir hryðjuverkavarnaáætlun Ástralíustjórnar, sagði að ekkert lausnargjald hefði verið greitt fyrir Wood. Í Khalis, 20 kílómetra norðvestur af Bakúba, gekk maður íklæddur íröskum hermannabúningi inn í mötuneyti þar sem fjöldi hermanna sat að snæðingi og sprengdi sprengjur sem hann bar á sér. Að minnsta kosti 26 hermenn fórust í sprengingunni og tugir særðust. Þá var í gær einnig gerð sjálfsmorðsárás með bílsprengju á lögreglustöð í austurhluta Bagdad. Átta lögreglumenn fórust.