Lítil áhrif aukinnar framleiðslu

Olíuframleiðsla verður aukin til að slá á verðið á olíufatinu, en talið er ólíklegt að það hafi nokkur áhrif. OPEC-ríkin náðu í morgun samkomulagi um að auka olíuframleiðslu um hálfa milljón tunna á dag í von um að það slái á olíuverð. Raunframleiðsla olíuframleiðsluríkjanna mun þó að líkindum ekki aukast í raun þar sem ríkin eru löngu tekin til við að dæla. Aukningin er þess utan aðeins táknræn og hefur lítil sem engin áhrif á heildarmagn framleiðslunnar. Olíuverð hefur verið hátt annars vegar vegna þess að OPEC-ríkin framleiða nú alla þá olíu sem þau geta framleitt og hins vegar vegna þess að olíuhreinsunarstöðvar hafa ekki undan. Það er einkum af þeim sökum sem það hefði lítið upp á sig að dæla upp meiri olíu þar sem ekki væri hægt að vinna neitt úr henni. Olíuverð þokast nú enn á ný upp og er talin hætta á að verðmetið frá í apríl verði slegið en það var ríflega 58 dollarar á fatið.