Ástandið hafi ekkert batnað í Írak

Ástandið í Írak hefur ekkert batnað frá því að Saddam Hussein var steypt af stóli, að mati Donalds Rumsfelds, varnarmálaráðherra Bandaríkjanna. Rumsfeld sat fyrir svörum hjá David Frost hjá BBC í gærkvöldi og var þá spurður hvort að hann teldi ástandið í Írak hafa batnað. Svarið var á þá leið að tölfræðilega séð hefði ástandið ekkert batnað en að það hefði engu að síður augljóslega batnað eftir því sem tíminn hefur liðið. Við lok stríðsins hefði herinn flúið og því næst verið handsamaður og sigur hafi unnist. Þá hafi uppreisnarmenn tekið til starfa og ástandið sveiflast vegna þessa. Rumsfeld bætti því við að margt slæmt hefði getað gerst sem ekki hefði gerst. Bandarískir hershöfðingjar í Írak líta uppreisnina orðið öðrum augum. Fréttastofan UPI hefur eftir bandaríska hershöfðingjanum Joseph Taluto, sem stjórnar meðal annars aðgerðum í Bakúba og Samarra, að hann skilji fullvel af hverju óbreyttir Írakar taka upp vopn til að berjast við hersetuliðið þar sem þeim mislíki vera liðsins í landinu. Taluto bætti því við að dagfarsprúðu fólki gæti misboðið hervagnarnir á götum úti, hermenn sem skipa fólki til og frá, vopnaðir hermenn á götum úti, sífelldar sprengjuárásir og fleira og að því fólki gæti fundist tímabært að berjast við hersetuliðið. Sér fyndist sem tvær uppreisnir væru í gangi: góð uppreisn og vond. Hins vegar mætti ekki ætla að árásirnar dyggðu til að hrekja hersetuliðið á brott. Ráðið til þess væri að vinna að pólitískum framförum í Írak.