Vill bíða með atkvæðagreiðslur

Forseti Framkvæmdastjórnar Evrópusambandsins segir rétt að bíða með frekari atkvæðagreiðslu um stjórnarskrá sambandsins eftir að Hollendingar og Frakkar höfnuðu henni. Jose Manuel Barroso segir að stjórnarskráin sé alls ekki endanlega búin að vera en hins vegar sé skynsamast að bíða með frekari atkvæðagreiðslur að sinni. Kjósendur hafi sýnt það í verki að þeir séu ekki reiðubúnir að samþykkja frekari samþjöppun Evrópu að svo stöddu. Á næstu misserum ættu því forkólfar Evrópusambandsins að einbeita sér að því að bæta efnahagsástandið í löndum sambandsins og draga úr atvinnuleysi.