Jackson er saklaus

Michael Jackson var í gær sýknaður af öllum ákæratriðum um að hafa misnotað þrettán ára gamlan pilt á búgarði sínum snemma árs 2003. Réttarhöldin yfir Michael Jackson hafa staðið yfir í fjóra mánuði. Kviðdómur kom saman í dómshúsinu í Santa Barbara í Kaliforníu í síðustu viku og sat á rökstólum í alls þrjátíu klukkustundir. Um þrjúleytið að staðartíma var svo dómurinn kveðinn upp. Kviðdómurinn sýknaði Jackson af öllum tíu ákæruatriðunum, þar á meðal því að hafa misnotað piltinn og að hafa gefið honum áfengi. Jackson mætti nokkuð seint í dómsalinn og sýndi engin svipbrigði þegar dómurinn var kveðinn upp. Þegar hann kom út veifaði hann til fjölmargra stuðningsmanna sinna sem komnir voru á vettvang. Ríkti mikill fögnuður á meðal fólksins og var hvítum dúfum sleppt við þetta tækifæri. Jackson ávarpaði hins vegar ekki fólkið heldur hélt samstundis á brott í svörtum jeppa.