Hindra barnaníðinga í Rússlandi

Lögregluyfirvöld í Svíþjóð, Noregi og Finnlandi starfa nú með lögreglunni í Rússlandi að því að hindra barnaníðinga í að misnota börn í Rússlandi. Rannsóknarlögreglan á Storskog-landamærastöðinni á landamærum Noregs og Rússlands hefur lengi haft grun um að dæmdir barnaníðingar ferðist til norðurhluta Rússlands í þeim tilgangi að misnota börn. Lögreglan á Barentssvæðinu í Noregi, Svíþjóð og Finnlandi beinir nú athyglinni að barnavændi og misnotkun barna undir lögaldri. Þetta hefur, ásamt því starfi sem samtökin „Björgum börnunum“ hafa innt af hendi, haft í för með sér skipulagt samstarf lögreglu í fjórum löndum, þvert á landamæri ríkjanna.