Kona skipuð ráðherra í Kúveit

Kona var í fyrsta sinn skipuð ráðherra í ríkisstjórn Kúveits í dag. Massouma al-Moubarak var skipuð ráðherra skipulagsmála en hún mun einnig stjórna þróunarmálum í stjórnsýslu Kúveits. Moubarak er stjórnmálafræðiprófessor við Kúveitháskóla en hún hefur lengi barist fyrir réttindum kvenna í landinu. Kúveit verður með þessu þriðja landið á Persaflóasvæðinu til að skipa konu í ríkisstjórn. Þróun virðist loks ætla að verða í átt til aukinna kvenréttinda í Kúveit, en í síðasta mánuði fengu konur bæði kosningarétt og urðu kjörgengar í landinu og þá voru tvær konur voru skipaðar í héraðsráð fyrr í þessum mánuði.