Kjötbollur af kvöldverðarborðinu

Kjúklingur og kjötsósa virðast hafa tekið við af kjötbollum sem vinsælasti kvöldmaturinn í Danmörku. Þetta kemur fram í niðurstöðum rannsóknar sem matvælastofnun Danmerkur gerði nýverið og fjallað er um í danska blaðinu Politiken. Samkvæmt rannsókninni, sem náði til fjögur þúsund manns, er hinn þjóðlegi réttur kjötbollur á leið af kvöldverðarborðinu í Danmörku en kjúklingur, ýmiss konar kjótsósa með pasta og pítsur virðast hins vegar renna ofan í Danskinn. Rannsóknin leiðir einnig í ljós að Danir borða of sætan og feitan mat eins og margar vestrænar þjóðir og þrátt fyrir margs konar herferðir hefur ekki tekist að fá dönsk börn til borða meiri fisk. Enn fremur kemur í ljós að dönsk börn og unglingar borða óreglulega, en aðeins 77 prósent barna 11 til 14 ára borða morgunmat og 69 prósent nærast í hádeginu.