Eldurinn virðist slokknaður

Eldurinn í olíuflutningaskipinu Fjord Champion við suðurstrendur Noregs virðist dáinn út. Skipið verður dregið að landi þar sem olíunni verður dælt af skipinu og skemmdir kannaðar. Samtals eru rúmleag 800 tonn af olíu um borð í Fjord Champion en engin merki sjást um olíu í sjónum í kringum skipið. Mikill viðbúnaður er vegna mengunarvarna. Eldurinn kviknaði í fyrrinótt og fyrr en varði stóð skipið í björtu báli og sprengingar kváðu við. Það var dregið lengra frá landi en ekki reynt að slökkva eldinn. Björn Bratfoss hjá norsku strandgæslunni segir að enginn eldur sjáist nú loga í skipinu en nokkur reykur stígi upp frá því. Slökkvilið er í viðbragðsstöðu en strandgæslan hefur í nótt ekki tekið áhættuna á að sprauta vatni á skipið í myrkrinu. Bratfoss segir augljóst að eldurinn sé að deyja út en það líði nokkrar klukkustundir áður en óhætt verði að fara um borð. Tveir dráttarbátar halda skipinu kyrru og munu síðan draga það að landi.