Taka lítið mark á Sýrlandsforseta

Bandaríkjamenn, Bretar og Frakkar taka lítið mark á loforði forseta Sýrlands um brottflutning sýrlenskra hersveita frá Líbanon og segja löngu kominn tíma á raunverulegar efndir. Þrýst hefur verið á Sýrlendinga á alþjóðavettvangi síðastliðin fimmtán ár að draga hersveitir sínar frá Líbanon sem hafa verið þar síðan borgarstríðinu í Líbanon lauk árið 1990. Öryggisráð Sameinuðu þjóðanna ályktaði í fyrra og krafðist þess að allir erlendir herjir hyrfu strax frá Líbanon. Þegar Rafik Hariri, fyrrverandi forsætisráðherra Líbanons, fórst í bílsprengju jókst þrýstingurinn til muna enda voru Sýrlendingar sakaðir um tilræðið. Í gær boðaði forseti Sýrlands, Bashar al-Assad, brottflutning hersveita sinna úr landinu í áföngum og sagði sumar verða fluttar að landamærum Sýrlands og Líbanons. Engar tímasetningar voru gefnar út. Alþjóðasamfélagið hefur tekið yfirlýsingu hans fálega og segir að ekki sé nógu langt gengið og löngu sé kominn tími á raunverulegar efndir. Frakkar og Bretar eru ekki sáttir og talsmaður Bandaríkjanna, Adam Ereli, sagði orð forsetans ekki nóg. Þá sagði utanríkisráðherra Ísraels, Silvan Shalom, yfirlýsingu al-Assads greinilega eingöngu til að fegra hlut Sýrlands og benti á að forsetinn hefði ekkert minnst á brotthvarf fjölda sýrlenskra leyniþjónustumanna sem eru í Líbanon.