Ungmennaaftökum hætt

Mannréttindasamtök fögnuðu í gær eftir að Hæstiréttur Bandaríkjanna úrskurðaði á þriðjudag að banna bæri dauðarefsingar á ungmennum sem fremja alvarlega glæpi innan átján ára aldurs. Rétturinn var klofinn í málinu, fimm dómarar gegn fjórum, en niðurstaða meirihlutans var að dauðarefsingar ungmenna stríddu gegn ákvæði stjórnarskrárinnar um bann við "harkalegum og óvenjulegum refsingum". Með úrskurðinum er bundinn endi á dómaframkvæmd í Bandaríkjunum sem lengi hefur sætt harðri alþjóðlegri gagnrýni. "Nú geta Bandaríkin með stolti afmáð nafn sitt af hinum neyðarlega lista yfir mannréttindabrjóta - þar á meðal eru ríki eins og Kína, Íran og Pakistan - sem enn framfylgja dauðadómum yfir afbrotaungmennum," hefur fréttavefur BBC eftir William Schultz, framkvæmdastjóra Bandaríkjadeildar Amnesty International. Úrskurðurinn féll með atkvæðum fimm dómara gegn fjórum og sneri við fyrri úrskurði frá árinu 1989. Með úrskurðinum eru ógiltir dauðadómar 72 morðingja, en þeir eiga allir sameiginlegt að hafa drýgt glæpi sína á unglingsaldri. Eftirleiðis verður saksóknurum um öll Bandaríkin óheimilt að fara fram á dauðadóm yfir ungmennum. Nítján af 50 ríkjum Bandaríkjanna voru enn með lög í gildi sem heimiluðu dauðadóma yfir fólki sem varð mannsbani innan við átján ára að aldri. Anthony Kennedy dómari, sem skrifar undir meirihlutaálit Hæstaréttar, segir að ungmenni skorti þroska til að skilja til fullnustu alvöru gerða sinna. Seth Waxman, verjandi Christophers Simmons, sem var dæmdur fyrir að verða nágrannakonu sinni að bana þegar hann var 17 ára, sagði dauðarefsingu ekki hafa neina fælandi verkun á ungmenni, þar sem þau mætu áhættu með öðrum hætti en fullþroska einstaklingar. Árið 1988 hafði rétturinn úrskurðað að dauðarefsingar skyldu ekki heimilar yfir fólki sem drýgði glæpi sína 15 ára eða yngra.