Fátækt barna á Vesturlöndum eykst

Fátækt meðal barna fer vaxandi í ríkari löndum heimsins. Velmegun barna er mest á Norðurlöndunum en í Bandaríkjunum lifir ríflega fimmtungur þeirra undir skilgreindum fátæktarmörkum. Barnahjálp Sameinuðu þjóðanna UNICEF birti í gær skýrslu um hagi barna í 24 aðildarlöndum Efnahags- og framfarastofnunarinnar OECD. Þar kemur fram að í sautján þessara landa hefur hlutfall barna sem búa undir fátæktarmörkum vaxið síðasta áratuginn. UNICEF telur barn vera fátækt ef þær tekjur sem notaðar eru til að framfleyta því eru meira en helmingi lægri en þær meðaltekjur sem börn í því þjóðfélagi búa við. Því gefa upplýsingarnar ágæta mynd af jöfnuði í þessum ríkjum. Norðurlöndin raða sér í efstu sæti listans yfir þau lönd þar sem börn búa við bestan hag en Bandaríkin og Mexíkó verma botnsætin. Þótt Norðmenn séu ekki í efsta sæti er staða þeirra talin sérstaklega eftirtektarverð því Noregur er eina landið þar sem fátækt á meðal barna þykir mjög lítil og fer auk þess minnkandi. UNICEF bendir á að stærð þjóðanna hafi hér nokkuð að segja, því fjölmennari sem þær eru þeim mun hærra hlutfall barna býr undir fátæktarmörkum. Stofnunin bendir ennfremur á að minna en tíundi hluti barna lifir undir fátæktarmörkum í þeim aðildarríkjum OECD sem verja meira en tíu prósentum þjóðarframleiðslu sinnar til velferðarmála. Miklu máli skiptir hins vegar hvernig þessum fjármunum er varið því fátækt er mismikil í löndum sem verja svipuðum upphæðum til þessara mála. Af því dregur UNICEF þá ályktun að hægt sé að draga úr fátækt barna í mörgum löndum án þess að auka þurfi ríkisútgjöld svo nokkru nemi. Vegna smæðarinnar er Ísland er ekki á meðal þeirra ríkja sem UNICEF skoðar í skýrslu sinni en talsmenn stofnunarinnar segja að fátækt barna sé ekki vandamál hérlendis heldur séum við á svipuðum slóðum og frændþjóðir okkar á Norðurlöndunum.