Fá ekki að skoða herstöð aftur

Íranar höfnuðu beiðni eftirlitsmanna á vegum Sameinuðu þjóðanna um að skoða aftur Parchin-herstöðina, en Bandaríkjamenn grunar að þar hafi farið fram tilraunir í tengslum við kjarnavopnaframleiðslu. Talsmenn Alþjóðakjarnorkueftirlitsins greindu frá því í dag að kjarnorkueftirlistmenn hefðu heimsótt herstöðina í janúar og farið fram á það að fá að koma aftur og kanna svæði sem ekki hefði náðst að rannsaka. Þessu höfnuðu Íranar og sögðu enga réttlætingu fyrir frekari skoðun. Bandaríkjamenn hafa að undanförnu deilt við Írana og fullyrt að þeir hyggist koma sér upp kjarnavopnum en Íranar hafa staðfastlega neitað því og segjast aðeins framleiða kjarnorkueldsneyti í friðsamlegum tilgangi. Vestrænir erindrekar sem hafa reynt að miðla málum hvetja Írana til samvinnu við eftirlitsmenn til þess að staðfesta megi fullyrðingar þeirra.