Fuglaflensulyf til á Íslandi

Bresk stjórnvöld hafa keypt 14,6 milljónir skammta af flensulyfinu Tamiflu til að verjast hugsanlegum fuglaflensufaraldri. Birgðum af lyfinu hefur einnig verið safnað hér á landi. Sérfræðingar Alþjóðaheilbrigðismálastofnunarinnar hafa varað við því að fuglaflensa sé næsti heimsfaraldur og aðeins tímaspursmál sé hvenær fuglaflensuveiran stökkbreytist og fari að smitast á milli manna en ekki bara úr fuglum í menn. Alls hafa þrettán manns látið lífið í Víetnam frá jólum. Náið er fylgst með öllum alifuglaviðskiptum í Ho Chi Minh borg til að reyna að hefta útbreiðsluna. Ekki er til bóluefni gegn flensunni og þróun þess gæti tekið marga mánuði. Alþjóðaheilbrigðismálastofnunin hefur mælt með Tamiflu til að verjast faraldrinum. Lyfið slær á einkenninn og getur hamlað smiti. Nú hafa bresk stjórnvöld ákveðið að kaupa 14,6 milljónir skammta af lyfinu sem er nóg til að meðhöndla fjórða hvern Breta. Hér á landi eru til birgðir af þessu lyfi og öðru sem nefnist Relenza. Samtals eru til sjö þúsund skammtar sem sérstaklega voru keyptir í fyrra til að verjast hugsanlegum fuglaflensufaraldri. Haraldur Briem sóttvarnalæknir segir þetta fyrstu varabirgðir en svo eru einnig lyf í almennri sölu svo meira er tiltækt. Hann segir magnið endurskoðað með vissu millibili, grannt sé fylgst með útbreiðslu flensunnar með það í huga að kaupa fleiri skammta.