Hart deilt á forsætisráðherra

Hart var deilt á Halldór Ásgrímsson forsætisráðherra í umræðum á Alþingi í dag um viðtal Brynhildar Ólafsdóttur, fréttamanns á Stöð tvö, við forsætisráðherra sem sýnt var í gær. Þar lýsti Halldór aðdraganda þess að Ísland samþykkti að styðja innrás Bandaríkjamanna í Írak, afleiðingar þess og ástæður, en það var Össur Skarphéðinsson sem bað um tækifæri til að ræða um viðtalið á Alþingi. Halldór gagnrýndi túlkun Össurar á því sem  fram kom í viðtalinu. Hann spurði hvort Össur vildi ekki lesa viðtalið áður en hann kæmi í pontu á Alþingi og sagði enn fremur að Össur gæti ekki ætlast til þess að þráspyrja hann um Íraksmálið ef Össur myndi ekki einu sinni sjálfur hvað Halldór hefði sagt í viðtalinu í gær. Halldór bent Össuri enn fremur á að hann hefði farið um landið undanfarna daga og rætt við fólkið í landinu sem hefði engan áhuga á Íraksmálinu. Ingibjörg Sólrún Gísladóttir, varaformaður Samfylkingarinnar, steig einnig í pontu og sagði það ekki rétt hjá forsætisráðherra að fólkinu í landinu væri alveg sama um málið. Steingrímur J. Sigfússon, formaður Vinstri - grænna, sagði í umræðunum að forsætisráðherra hefði loks viðurkennt með óbeinum hætti að varnarsamstarfið hefði verið lykillinn að skjótum viðbrögðum Íslands við beiðni Bandaríkjamanna um stuðning við innrásina. „Bandaríkjamönnum voru gefin frjáls afnot af nafni Íslands til að nota þegar þeim sýndist og eins og þeim sýndist, ólögmætum stríðaðgerðum sínum til stuðnings og réttlætingar. Og loks er viðurkennt óbeint að menn voru að borga á sig vegna væntanlegra samningaviðræðna við herinn um fjórar gamlar herþotur. Þvílík niðurlæging fyrir utanríkismál einnar sjálfstæðrar þjóðar,“ sagði Steingrímur.