Störfum fækkar mjög í Danmörku

Í fyrradag boðaði forsætisráðherra Danmerkur, Anders Fogh Rasmussen, þingkosningar eftir þrjár vikur. Kosningabaráttan var í raun farin af stað í rólegheitum en síðustu sólarhringa hefur verið um algjöra flugeldasýningu að ræða, bæði hjá flokkum og fjölmiðlum. Rykið dustað af gömlum loforðum segja sumir kjósendur og benda um leið á svikin loforð.Tveir stærstu flokkarnir, Venstre-flokkur Anders Fogh, og Sósíaldemókratarnir, flokkur Mogens Lykketoft, boða tugþúsundir nýrra starfa á næstu fjórum árum. Alþjóðavæðing í atvinnulífinu hefur leitt til þess að fleiri og fleiri dönsk fyrirtæki loka eða minnka umsvif sín í Danmörku þar sem vinnuafl er ódýrara í Austur-Evrópu og Asíu. Fréttastofa TV2-sjónvarpsstöðvarinnar fékk í gærkvöldi tvo viðskiptafræðinga til að reikna út hversu mörg störf hafa farið í súginn hjá Dönum á kjörtímabilinu. Annar sagði 20-30.000 en hinn sagði að allt í allt mætti segja að þau væru um 50.000. Eins og títt er með tölur veltur þetta vissulega á því hvaða forsendur menn gefa sér en þær gefa þó til kynna hvernig ástandið er. Síðast í gær bárust fréttir af því að 500 manns missi vinnuna þegar sláturhúsi verður lokað í Hjørring á Norður-Jótlandi í maí. Ekki þægilegt í miðri kosningabaráttu og lofaði Anders Fogh Rasmussen að gripið yrði til aðgerða strax með að finna fólkinu vinnu eða bjóða því að mennta sig. Andstæðingurinn Mogens Lykketoft segir: „Þetta er of seint. Stjórnin hefði átt að vera búin að grípa til aðgerða fyrir löngu.“ Aðrir minni flokkar vilja ólmir beina umræðunni að Írak og innflytjendamálum. En kjósendur vilja ræða barna- og fjölskyldumál, atvinnumál og málefni aldraðra. Könnun danska ríkissjónvarpsins sýnir að þessi mál eru efst á baugi hjá 45 prósentum Dana.