Klofin stjórn vegna Guantanamo

Ríkisstjórn Bandaríkjanna er klofin í afstöðu sinni til þess hvort loka eigi fangabúðunum á Guantanamo-flóa við Kúbu. Þetta sagði Duncan Hunter, þingmaður Repúblikanaflokksins, í viðtali við Fox-fréttastofuna í dag. Þær raddir hafa orðið háværari í Bandaríkjunum að búðunum verði lokað eftir að fjölmargar fréttir hafa borist af illri meðferð á föngum þar. Mannréttindasamtök hafa gagnrýnt Bandaríkjamenn harðlega og sakað þá um að halda föngunum, sem eru grunaðir hryðjuverkamenn, án þess að rétta yfir þeim og lýsti Amnesty International því yfir á dögunum að búðirnar væru gúlag nútímans. Hunter sagði í viðtalinu í dag að hann teldi best að loka búðunum en áður hefur Jimmy Carter, fyrrverandi forseti Bandaríkjanna, viðrað sömu skoðun. Ríkisstjórn Bandaríkjanna hefur verið nokkuð misvísandi í svörum sínum um málið. George Bush Bandaríkjaforseti sagði í síðustu viku að verið væri að skoða alla möguleika í stöðunni en bæði Donald Rumsfeld varnarmálaráðherra og Dick Cheney varaforseti hafa neitað því að til standi að loka búðunum.