Stjórnarandstaðan sigraði

Líbanska stjórnarandstaðan sigraði í þingkosningunum í landinu en fjórða og síðasta umferð þeirra fór fram í fyrradag. Þar með snarminnka ítök Sýrlendinga í landinu. Lokaumferðarinnar í líbönsku kosningunum hafði verið beðið með mikilli eftirvæntingu en þá var kosið í norðurhluta landsins. Eftir fyrsta hlutann 29. maí virtist allt stefna í auðveldan sigur andsýrlensku flokkanna en gott gengi Hizbollah í öðrum hlutanum og óvænt velgengni gamla byltingarleiðtogans Michel Aoun í þriðja hlutanum hleypti mikilli óvissu í spilið. Framan af kjördegi var kjörsókn nokkuð dræm en eftir ákall Saad Hariri, leiðtoga stjórnarandstöðunnar, kom kippur í aðsóknina. Þegar yfir lauk höfðu 48 prósent kjósenda neytt atkvæðisréttar síns sem er talsverð aukning frá því í kosningunum 2000. Kosningabandalag Hariri þurfti 21 sæti af 28 til að tryggja sér meirihluta á líbanska þinginu en þegar þorri atkvæðanna hafði verið talinn virtist allt stefna í að bandalagið fengi öll sætin 28. Í gærmorgun viðurkenndi Suleiman Franjieh, leiðtogi bandamanna Sýrlendinga í Líbanon og fyrrverandi innanríkisráðherra, að þeir hefðu beðið lægri hlut. Mikil fagnaðarlæti gripu um sig í Trípólí, höfuðstaðar norðursins, og eins veifuðu margir fánum og þeyttu bílflautur í höfuðborginni Beirút. Allt útlit er fyrir að Saad Hariri myndi nýja ríkisstjórn og verði forsætisráðherra, rétt eins og Rafik faðir hans, sem ráðinn var af dögum fyrr á árinu. Hans bíða þó ærin verkefni, til dæmis að lagfæra bágborin efnahag þjóðarinnar, aðstoða Sameinuðu þjóðirnar við rannsókn á morðinu á föður hans og verða við kalli samtakanna um afvopnun skæruliðahópa, sérstaklega Hizbollah. Enn fremur mistókst kosningabandalagi hans að ná 2/3 hluta þingsætanna og getur því ekki gert neinar breytingar á stjórnarskránni. Það þýðir að ekki verður hróflað við Emile Lahoud forseta en hann er dyggur bandamaður Sýrlendinga en hann lét á síðasta ári lengja kjörtímabil sitt um tvö ár fyrir atbeina stjórnvalda í Damaskus. Lahoud mun eflaust reynast Hariri óþægur ljár í þúfu.