Svartsýni á árangur

Við upphaf tveggja daga leiðtogafundar Evrópusambandsins í Brussel í gær kallaði Jacques Chirac Frakklandsforseti eftir því að efnt verði til sérstaks leiðtogafundar aðildarríkjanna 25 um framtíð sambandsins. Chirac sagði að forystumenn ESB-landanna yrðu að leggja það niður fyrir sér hvernig fara mætti að því að "brúa þá gjá sem annars er hætt við að víkki enn milli Evrópu[sambandsins] og borgara þess". Þessi gjá varð augsýnileg er franskir og hollenskir kjósendur felldu stjórnarskrársáttmála ESB í þjóðaratkvæðagreiðslum, þvert á vilja ráðamanna. "Þetta er einn erfiðasti leiðtogafundur sem við höfum nokkru sinni haldið," sagði Jean Asselborn, utanríkisráðherra Lúxemborgar, sem er nú að ljúka formennskumisseri sínu í sambandinu. Við upphaf fundarins var svartsýni ríkjandi um að á honum tækist að ná samstöðu um hvað gera skyldi til að komast yfir kreppuna sem synjanirnar tvær hafa orsakað. Annað stórt deilumál varpaði líka skugga á. "Ég held að það takist ekki samkomulag um fjárlögin; ágreiningurinn er of mikill," sagði sænski forsætisráðherrann, Göran Persson, er hann mætti til fundarins. Stefnt hafði verið að því að á fundinum myndu leiðtogarnir samþykkja fjárlagaramma sambandsins fyrir tímabilið 2007-2013. En í drögunum að því samkomulagi var gert ráð fyrir því að endurgreiðslur sem Bretar hafa fengið úr sameiginlegum sjóðum sambandsins yrðu afnumdar í áföngum, sem liður í allsherjarendurskoðun á fyrirkomulagi fjármögnunar hins stækkaða Evrópusambands. Þessu hafnar breska stjórnin alfarið. Utanríkisráðherrann Jack Straw ítrekaði við komuna til Brussel að ekki kæmi til greina af Breta hálfu að fallast á þau drög að málamiðlun sem fyrir lægju. Ef svo skyldi fara að fundinum ljúki án áþreifanlegs árangurs í að leysa þessar deilur myndi það ýta enn undir þá tilfinningu meðal íbúa sambandsins, og ekki síður í löndum utan þess, að sambandið sé orðið áttavillt og óvissa viðvarandi um framtíðarstefnu þess.