Jackson sýknaður af öllum ákæruatriðum

Kviðdómur sýknaði nú fyrir stundu Michael Jackson af öllum ákæruatriðum en Jackson var ákærður fyrir að hafa misnotað 13 ára dreng og gefið honum áfengi. Kviðdómur taldi Michael Jackson saklausan í öllum tíu atriðum ákærunnar. Michael Jackson gengur því frjáls maður úr dómhúsinu í Santa María í Kaliforníu. Niðurstöðu kviðdóms var beðið með mikilli eftirvæntingu og höfðu þúsundir manna safnast fyrir utan dómhúsið. Að minnsta kosti 2.000 blaðamenn frá öllum heimshornum fylgdust með réttarhöldunum yfir Jackson sem hófust 31. janúar. Jackson hélt því allan tímann fram að hann væri saklaus. Michael Jackson sýndi lítil viðbrögð önnur en bros, en mikil þreytumerki var að sjá á Jackson. Gríðarleg fagnaðarlæti brutust út fyrir utan dómhúsið þegar niðurstaðan var ljós. Michael Jackson gekk rakleiðis úr dómhúsinu og sendi aðdáendum sínum fingurkoss. Hann veitti engin viðtöl heldur þegar í stað til Neverland búgarðsins sem er í um 45 mínútna fjarlægð frá dómhúsinu. Átta konur og fjórir karlar voru í kviðdómi og tók það kviðdóminn 32 klukkustundir að komast að niðurstöðu.