Fyrsta ferðin síðan Columbia fórst

Geimferjunni Discovery verður skotið á loft frá Canaveral-höfða á Flórída á morgun. Þetta er fyrsta ferð ferjunnar í geiminn frá því geimferjan Columbia fórst í ferð sinni til jarðar fyrir tveimur árum en öll áhöfnin lét lífið. Mikil eftirvænting ríkir vestanhafs vegna ferðar Discovery í geiminn en sjö geimfarar verða um borð og mun ferðin taka tólf daga. Tilgangur ferðarinnar er meðal annars að prófa ýmsar endurbætur sem gerðar hafa verið á geimferjunni frá Columbiu-slysinu í febrúar árið 2003 en aðalvinnan verður við alþjóðlegu geimstöðina. Fulltrúar Geimferðastofnunar Bandaríkjanna, NASA, segja að mikið verk hafi verið unnið síðan sá hörmulegi atburður varð en nú sé Discovery tilbúin, geimfararnir séu tilbúnir og bandaríska þjóðin sé tilbúin. Niðurtalning er því hafin að nýju við Kennedy-geimstöðina á Canaveral-höfða og eru miklar vonir bundnar við ferðina. Ekki er talið að veðrið komi í veg fyrir geimskotið á morgun því spáin er ágæt fyrir svæðið.