Rannsókn hafi valdið ómældum skaða

Íslenskir hestaútflytjendur fagna því að loks sé komin niðurstaða í rannsókn þýskra tollyfirvalda á meintri skipulagðri glæpastarfsemi þeirra. Málið reyndist allt byggt á misskilningi en hefur valdið hestaút- og innflytjendum ómældum skaða, að sögn formanns Landssambands hestamanna. Þýsk tollayfirvöld réðust til atlögu gegn hrossainnflytjendum þar í landi árið 1998. Töldu þau víst að inn- og útflytjendur væru í samsæri til að svíkja undan skatti. Allt reyndist þetta á misskilningi byggt og hafa málin verið nær alveg felld niður. Jón Albert Sigurbjörnsson, formaður Landssambands hestamanna, segir íslenska hestaútflytjendur káta með að niðustaða sé fengin í málið. Þeir hafi alla tíð bent á að um storm í vatnsglasi væri að ræða. Margir hafi farið illa út úr þessu, sérstaklega menn sem flutt hafi út hesta til Þýskalands í stórum stíl fyrir 10-15 árum. Þeir hafi tapað föstum viðskiptavinum en einnig hafi verið gerð skattrannsókn í fyrirtækjum hjá einstaklingum sem hafi verið viðskiptamenn íslensku hestaútflytjendanna. Menn séu séu sárir eftir. Aðspurður hvort útflutningur á hestum hafi aukist í aftur eftir málið segir Jón Albert að útflutningurinn hafi breyst mjög. Útlendingar hafi undanfarin ár komið sér upp eigin hrossastofni og rækti því sjálfir sína hesta. Mikil eftirspurn sé þó eftir góðum hestum. Íslendingar hafi staðið sig vel á heimsmeistaramótum og landsmótum og fleiri uppákomum og séu með bestu hrossin. Útlendingar sæki því enn hross til Íslands í stórum stíl.