Santini hættur með Tottenham

Jacques Santini knattspyrnustjóri enska úrvalsdeildarliðsins Tottenham sagði í dag starfi sínu lausu öllum að óvörum. Santini sem aðeins hefur verið við stjórnvölinn á White Hart Lane síðan í sumar tilkynnti félaginu í dag að hann vildi halda aftur heim til Frakklands og segir hann það vera vegna persónulegra mála sem skyndilega hafi komið upp. Martin Jol aðstoðarmaður Santini mun taka tímabundið við Tottenham liðinu sem mætir Hermanni Hreiðarssyni og félögum í Charlton um helgina. Frank Arnesen yfirmaður íþróttamála hjá Tottenham segir að vænta megi yfirlýsingar frá félaginu vegna þessa á mánudag.