Leið Eng­lands al­gjör mar­tröð eins og staðan er

Englendingar hófu riðlakeppnina á flottum 4-2 sigri gegn Króatíu og eru því í góðum málum fyrir leikina við Gana og Panama.

Þeir sitja í efsta sæti L-riðils en það lið mun í 32-liða úrslitunum mæta liði úr 3. sæti E, H, I, J eða K-riðli (það veltur á árangri liðanna í 3. sæti). 

Eins og staðan er núna þá yrði það stjörnum prýtt lið Portúgals sem England myndi mæta, strax í fyrstu umferð útsláttarkeppninnar, því Portúgal er í 3. sæti K-riðils eftir óvænt jafntefli við Austur-Kongó í fyrsta leik. BBC sýnir á vefsíðu sinni hvernig útsláttarkeppnin myndi líta út miðað við núverandi stöðu í riðlunum.

Leikir við Portúgal, Spán, Frakkland og Argentínu?

Miðað við stöðuna í riðlunum núna, og líkleg úrslit í útsláttarkeppninni, myndi England sem sagt byrja á að mæta Portúgal, gæti svo mætt Spáni í 16-liða úrslitum, því næst Frakklandi eða Brasilíu, og svo Argentínu á leið í úrslitaleikinn.

Öll þessi lið eru nú „sömu megin“ í útsláttarkeppninni en í hinum helmingnum eru Þýskaland, Holland, Marokkó og Noregur á meðal sterkustu þjóðanna sem þar með gætu mögulega beðið Englands í úrslitaleiknum.

Það á hins vegar margt eftir að gerast áður en þessi mál skýrast og til að mynda ljóst að ólíklegt er að Spánn og Portúgal endi í 3. sæti síns riðils eins og staðan er núna.

Á HM í ár eru í fyrsta sinn 48 lið með og aðeins 16 þeirra falla út eftir riðlakeppnina, áður en 32-liða útsláttarkeppni tekur við. Þetta þýðir að í riðlunum tólf komast tvö lið upp úr hverjum riðli og svo átta lið með bestan árangur í 3. sæti síns riðils.

Tvö lið eru þegar úr leik en það eru Tyrkland og Haítí sem ljóst er að enda á botni sinna riðla.