Greip gæsina þegar hún gafst og leiddi Hollendinga til stór­sigurs

Hollendingar unnu lífsnauðsynlegan sigur á Svíþjóð er liðin mættust í F-riðli HM í fótbolta í kvöld. Lokatölur 4-1 sigur Hollendinga sem verma toppsæti riðilsins.

Segja má að Brian Brobbey, sóknarmaður liðsins hafi gripið tækifærið þegar það gafst í kvöld. 

Brobbey fékk tækifæri í byrjunarliðinu gegn Svíum eftir að hafa vermt varamannabekkinn í fyrsta leik gegn Japan og hann var ekki lengi að láta til sín taka. 

Á 5. mínútu leiksins kom hann Hollendingum yfir með fyrsta marki leiksins eftir stoðsendingu frá Cody Gakppo. 1-0. 

Rúmum tólf mínútum síðar tvöfaldaði hann forystu Hollendinga og stóðu leikar 2-0 í hálfleik. Yfirburðir Hollendinga miklir. 

Ekki var langt liðið á seinni hálfleikinn þegar að Cody Gakpo bætti við þriðja marki Hollendinga og sjö mínútum síðar var hann aftur á ferðinni er hann bætti við fjórða markinu og sínu öðru í leiknum. 

Anthony Elanga klóraði í bakkann fyrir Svía á 59. mínútu en Crysencio Summerville sá um að geirnegla 5-1 sigur Hollendinga með marki á 89.mínútu.

Sigurinn gerir það að verkum að Hollendingar stökkva upp fyrir Svía í toppsæti riðilsins og eru þar með fjögur stig, einu stigi meira en Svíar í 2. sætinu. Japan fylgir þar á eftir með eitt stig og Túnis vermir botnsætið og er án stiga. Japan og Túnis mætast í nótt.