Skipin á heimleið

Eftirlitsvélar á vegum Atlantshafsbandalagsins hafa vaktað rússnesku herskipin í allan dag en skipin eru nú að tínast heim á leið, hvert á fætur öðru. Rússar segja að óveður hafi valdið því að þrír björgunarbátar skoluðust fyrir borð. Fyrst varð vart við rússnesku herskipin út af Vopnafirði en þau færðu sig síðan um set og hafa síðustu dagana haldið til út af Þistilfirði, norðaustur af Raufarhöfn, um 25 mílur frá landi. Í gær, síðla sunnudags, hélt flugmóðurskipið í brott og um hádegisbilið í dag héldu tvö önnur herskip sömu leið, í norðuátt. Þá eru eftir fjögur rússnesk herskip: beitiskipið Pétur Mikli, birgðaskip og tvö dráttarskip. Landhelgisgæslan hafði samband við þessi skip í dag og sögðust þau þá vera að huga til brottfarar eftir 36 klukkustundir. Herflugvélar á vegum Atlantshafsbandalagsins hafa góðar gætur á herskipunum. Í morgun flaug Orion flugvél frá Noregi yfir þau en um hádegisbilið virtist sem bresk Nimrod vél hafi tekið við eftirlitsstörfunum og hringsólaði yfir herskipunum fram eftir degi og flaug meðal annars lágflug niður yfir herskipin. Flugvél á vegum Landhelgisgæslunnar uppgötvaði olíuflekk við skipin og hefur Siglingastofnun sett í gang reklíkan til að athuga dreifingu olíunnar. Svo virðist hins vegar sem aðeins sé um lítið magn að ræða. Þá komu íslensk fiskiskip í dag með þrjá mannlausa björgunarbáta af rússnesku herskipunum til hafnar á Akureyri og hefur Landhelgisgæslan þá til athugunar. Talsmaður rússneska sendiráðsins segir að þá hafi tekið út af í vondu veðri en hafi ekki verið notaðir í neyðartilviki.