Rangt stríð á röngum stað ...

Rangt stríð á röngum stað á röngum tíma. Þetta segir John Kerry um stríðið í Írak og gagnrýnir Bush forseta harðlega. Í herbúðum Bush yppta menn öxlum og segja þetta dæmigert fyrir Kerry, sem enn og aftur hefur skipt um skoðun. Kerry hefur ekki áður verið jafn afgerandi og harðorður í málflutningi sínum og þessi nýi tónn er greinileg afleiðing slaks gengi í skoðanakönnunum undanfarið. Kerry sagði á kosningafundi í gær að kjósendur yrðu að gera upp við sig hvort þeir vildu frekar rangar ákvarðanir og ranga stefnu fyrir Bandaríkin, eða áætlun hans um að skapa fleiri störf, styrkja efnahaginn og tryggja aðgengi almennings að heilbrigðisþjónustu. Kerry vill leggja áherslu á þessa þætti í málflutningi sínum en það voru yfirlýsingar hans um stríðið í Írak sem vöktu mesta athygli. Hann sagðist stefna að því að kalla bandarískar hersveitir þaðan á fyrsta kjörtímabili sínu og sagði fullyrðingar Bush-stjórnarinnar um bandalag margra þjóða í Írak tóma þvælu. Nokkur hundruð hermenn hér og þar breyttu engu því yfirgnæfandi meirihluti hermanna í Írak væru bandarískir og mannfallið í röðum þeirra langmest. Að auki fengju bandarískir skattgreiðendur sendan reikninginn. Stríðið hefði kostað tvö hundruð milljarða dollara sem ekki væri hægt að eyða í heilbrigðismál, menntakerfið eða nokkuð annað. Í herbúðum Bush gripu menn yfirlýsingar um brotthvarf hermanna frá Írak á lofti og sögðu þær ábyrgðarlausar. Rangt væri að setja tímamörk þar sem enginn vissi hvort þau stæðust. Réttara væri að miða við brotthvarf þegar verkinu væri lokið, auk þess sem yfirlýsingar um brotthvarf gæfu hryðjuverkamönnum í raun forskot. Og Bush gerði gys að Kerry, sagði hann hafa vaknað í gærmorgun með nýjum kosningastjórum og með nýja skoðun á stríðinu í Írak - ekki þá fyrstu. Burtséð frá öllu tali Kerrys hefði stríðið verið rétt fyrir Bandaríkin.