Réttarhöldin hefjast að nýju

Réttarhöldin yfir rússneska olíujöfrinum Mikhaíl Khodorkovský, aðaleiganda Júkos-olíurisans, vegna meints fjármálamisferlis og skattsvika munu hefjast að nýju í dag eftir viku hlé. Khodorkovský og viðskiptafélagi hans, Platon Lebedev, eru sakaðir um að hafa valdið rússneska ríkinu skaða upp á einn milljarð bandaríkjadala og eiga allt að tíu ára fangelsi yfir höfði sér. Réttarhöldin, sem hófust um miðjan júní, hafa gengið á hraða snigilsins samkvæmt Reuters-fréttastofunni og hefur Khodorkovský meðal annars tekið upp bók og lesið í henni á meðan ákæruvaldið flytur mál sitt sem byggir á ógrynni skjala og gagna.