Múrinn stenst ekki alþjóðalög

Öryggismúr Ísraels brýtur í bága við alþjóðalög og heftir ferðafrelsi Palestínumanna ásamt atvinnufrelsi og frelsi til að leita menntunar og heilbrigðisþjónustu. Þetta er niðurstaða alþjóðadómstólsins í Haag, sem dregur einnig í efa að múrinn þjóni í raun öryggishagsmunum Ísraels. Ísraelska dagblaðið Haarets komst yfir úrskurð dómara alþjóðadómstólsins, en birta á hann í dag. Niðurstaða fjórtán dómara af fimmtán er á þá leið, að múrinn standist ekki alþjóðalög. Samkvæmt frétt blaðsins kemst dómstóllinn að því, að rífa verði múrinn og greiða palestínskum eigendum lands, sem lagt var hald á, bætur. Í úrskurðinum segir einnig, að dómurinn sé ekki sannfærður um að múrinn hafi í raun verið reistur til varnar óbreyttum borgurum í Ísrael. Þess utan brjóti múrinn grundvallarmannréttindi Palestínumanna og öryggissjónarmið dugi ekki til að réttlæta þau brot. Ísraelsríki brjóti skuldbindingar sem það hafi gengist undir með því að undirrita alþjóðleg mannréttindalög. Það var öryggisráð Sameinuðu þjóðanna sem bað alþjóðadómstólinn að úrskurða um múrinn og niðurstaðan ætti því að verða kynnt ráðinu. Fulltrúi PLO hjá Sameinuðu þjóðunum og sendifulltrúar fjöldamargra Arabaríkja munu að líkindum óska eftir neyðarfundi ráðsins til að fjalla um málið, en Ísrael mun með fulltyngi Bandaríkjanna reyna að koma í veg fyrir að öryggisráðið fjalli um úrskurðinn. Ísraelsstjórn gerir sér einnig vonir um stuðning Evrópusambandsins við að koma í veg fyrir hugsanlegar refsiaðgerðir, sambærilegar við þær sem Suður-Afríka sætti á tímum aðskilnaðarstefnunnar Apartheid. Stuðningur Evrópusambandsins verður þó að teljast ólíklegur í ljósi yfirlýsinga morgunsins, en talsmenn Evrópusambandsins segja að svo virðist, sem úrskurður alþjóðadómstólsins staðfesti að múrinn brjóti í bága við alþjóðalög. Í morgun hvöttu talsmennirnir stjórnvöld í Ísrael til að rífa múrinn niður á hernumdum svæðum á Vesturbakkanum, þar með talið í Jerúsalem. Ísraelsmenn hafa þó ekki neitt slíkt í hyggju heldur ætla þeir að virða úrskurðinn að vettugi, enda er hann ekki bindandi. Dómsmálaráðherra Ísraels sagði úrskurði Hæstaréttar Ísraels eina skipta máli, niðurstaða alþjóðadómstólsins í Haag væri ómarktæk með hliðsjón af því að þar sætu dómarar frá Evrópusambandslöndum sem grunur léki á að væru ekki sérstaklega hliðhollir Ísraelsríki.