Talíbanar hóta frekari árásum

Þrír íslenskir friðargæsluliðar slösuðust í sjálfsmorðsárás Talíbana í Kabúl í Afganistan í dag. Talíbanar hóta frekari árásum. Alls voru átta friðargæsluliðar saman á ferð í þekktri verslunargötu í miðborg Kabúl þegar árásin var gerð, þar af sex Íslendingar. Einn þeirra var Hallgrímur Sigurðsson, yfirmaður flugvallarins í Kabúl. Hann segir þrjár handsprengjur hafa sprungið í námunda við þá með nokkurra sekúndna millibili. Hann kveðst ekki viss hvort þeim hafi verið kastað að þeim eða hvort þær hafi hangið utan á árásarmanninum þegar þær sprungu.  Friðargæsluliðarnir ákváðu í skyndingu að forða sér af vettvangi á öðrum bílnum en hinn var óökufær eftir árásina. Þeir vildu ekki taka áhættuna á því að lokast inni vegna bíla og mannsafnaðar sem hefði þýtt langa bið eftir sjúkrabíl. Tveir friðargæsluliðanna, Stefán Gunnarsson, flugumsjónarmaður, og Steinar Örn Magnússon, slökkviliðsmaður, særðust í árásinni þegar þeir fengu sprengjuflísar í fætur, framhandlegg og neðri hluta líkamans. Einn til viðbótar, Sverrir Haukur Grönli, hlaut minniháttar skrámur. Líðan Íslendinganna er góð hefur Hallgrímur eftir læknum á þýska hersjúkrahúsinu sem farið var með mennina á. Hann segir það besta sjúkrahúsið í Kabúl og mjög fullkomið.   Auk friðargæsluliðanna slasaðist erlend kona í árásinni en óvíst er hverrar þjóðar hún er eða hvort hún var á ferð með friðargæsluliðunum. Óstaðfestar fregnir herma jafnframt að ung stúlka á aldrinu tíu til tólf ára hafi látist í árásinni. Fréttamaður CNN í Kabúl segir að viðvaningur hafi gert árásina og líklega eiga Íslendingarnir því lífið að þakka. Friðargæsliðarnir voru að auki í vestum og með hjálpa. Hallgrímur segir ómögulegt að segja til um hugsanleg áhrif á starf íslensku friðargæslunnar í Kabúl en alls eru sextán Íslendingar við störf þar. Talsmaður Talíbana sagði liðsmann þeirra hafa gert árásina og hún væri aðeins fyrsta árásin í hrynu sem væri yfirvofandi. Hallgrímur segir sína tilfinningu vera þá að tilviljun hafi ráðið því að þeir hafi orðið fórnarlömb árásarinnar. Hann telur útilokað að ætlunin hafi verið að ráðast sérstaklega á Íslendinga.