Kerry ausinn lofi á flokksþingi

John Kerry mun leiða baráttuna gegn hryðjuverkum betur en George Bush, endurvekja von hjá fólkinu í landinu og stuðla að jafnrétti. Þetta segir hver ræðumaðurinn á fætur öðrum á flokksþingi Demókrata, sem nú stendur sem yfir í Boston. Mikill einhugur ríkir á flokksþingi Demókrata og keppist hver ræðumaðurinn á fætur öðrum við að ausa forsetaefnið John Kerry lofi. Meðal þeirra sem stigið hafa í pontu eru fyrrverandi forsetarnir Bill Clinton og Jimmy Carter, Hillary eiginkona Clintons, Ron Reagan, sonur Ronalds, Tereza Heinz Kerry eiginkona Johns og þingmennirnir Ted Kennedy og Barack Obama. Allir hafa þeir farið fögrum orðum um Kerry og lagt sérstaka áherslu á hæfni hans til þess að leiða baráttuna gegn hryðjuverkum. Það kemur kannski ekki á óvart með tilliti til þess hve illa hefur gengið að fá almenning til þess að trúa því að þar geti hann staðið sig betur en núverandi forseti, George Bush. Meðal ræðumanna gærkvöldsins var Teresa Heinz, eiginkona Kerrys, sem sagði mann sinn hafa sýnt það í verki á yngri árum að hann væri tilbúinn að leggja líf sitt að veði fyrir föðurlandið. Þá sagði Barack Osama, þingmaður Demókrata í Illinois, sem margir telja framtíðarforsetaefni, að Kerry hefði aldrei sent unga menn til Íraks án þess að vera þess fullviss að nægur liðsafli væri á staðnum til að sigra og ná fram friði og öryggi. Rétt eins og liðsforinginn Kerry hafi ekki hikað við að leggja líf sitt í hættu fyrir menn sína í Víetnam, muni forsetinn Kerry ekki hika við að nota her sinn til að veita Bandaríkjamönnum frið og öryggi. Ted Kennedy þingmaður í Massachusets tók í sama streng og sagði megin ógn Bandaríkjanna í dag vera fjögur ár í viðbót undir stjórn George Bush. Síðan er bara að bíða og sjá hvort allt hrósið verði til þess að almenningur í Bandaríkjunum átti sig loks á því hver Kerry er, en samkvæmt nýlegum skoðanakönnunum veit annar hver kjósandi ekki fyrir hvað hann stendur.