Góðhjartaði vinstri bakvörðurinn fær tækifæri í ensku úrvalsdeildinni

Sumarið 2012 íhugaði Tyrone Mings að leggja skóna á hilluna til að gerast húsnæðislánaráðgjafi. Blessunarlega lét hann það eiga sig og nú, þremur árum seinna, er hann dýrasti leikmaður í sögu Bournemouth og á að hjálpa liðinu að halda sæti sínu í ensku úrvalsdeildinni.

Þessi öskubuskusaga byrjaði hjá Southampton þar sem Mings fékk sitt fótboltauppeldi. Hann var hins vegar látinn fara frá Dýrlingunum þegar hann var 16 ára vegna þess að hann var ekki nógu líkamlega þroskaður. Það hefur þó tognað all hressilega úr Mings en í dag er hann 196 cm á hæð.

Árið 2011 gekk Mings til liðs við utandeildarlið Yate Town en meðfram því að leika með liðinu vann hann við glasatínslu á bar. Mings fékk svo vinnu í húsnæðislánabransanum og gekk svo vel þar að hann hugsaði alvarlega um að hætta í fótbolta. En hann hélt áfram og gekk í raðir Chippenham Town. Þaðan var hann svo keyptur til Ipswich Town á 10.000 pund eftir að hafa heillað knattspyrnustjórann Mick McCarthy í æfingaleik.

Mings spilaði ekki mikið fyrstu tvö tímabil sín hjá Ipswich en eftir að Aaron Cresswell fór til West Ham opnaðist möguleiki fyrir hann. Mings eignaði sér stöðu vinstri bakvarðar og frammistaða hans fór að vekja athygli, svo mikla að hann var orðaður við lið á borð við Arsenal og Chelsea.

Mings vakti ekki einungis athygli innan vallar heldur einnig utan hans, en bakvörðurinn sterki er duglegur að láta gott af sér leiða. Hann gaf heimilislausum t.a.m. að borða á jólunum fyrir tveimur árum og í byrjun síðasta tímabils endurgreiddi hann stuðningsmönnum Ipswich treyjur með nafninu hans aftan á eftir að hann skipti um treyjunúmer.