Risarottur hrella Breta

Íbúar í Bradford á Englandi eru skelfingu lostnir eftir að risarotta var drepin í bænum á dögunum. Rottan er helmingi stærri en venjulegar rottur og óttast menn að tegundin sé nú að ryðja sér til rúms á svæðinu því fleiri slíkar hafa sést undanfarna daga. 31 árs gamall Breti, Brandon Goddard skaut kvikyndið á færi en rottan reyndist rúmir 76 sentimetrar að lengd.

Styðja bandaríska dómara fjárhagslega

Færst hefur í vöxt sumum ríkjum Bandaríkjanna að hagsmunahópar styðji fjárhagslega við bakið á dómurum sem sækjast eftir kosningu í hæstarétt dómstóla ríkjanna.

Rappari í felum vegna í forsetaframboðs

Tónlistarmaðurinn Wyclef Jean sem ættaður er frá Haíti er í felum en hann segist hafa fengið morðhótanir undanfarna daga og vikur vegna framboðs síns til forsetaembættis Haíti. Haft er eftir Jean að hann hafi fengið margar símhringingar þar á meðal eina þar sem honum var sagt að koma sér burt frá Haíti.

Sjö látnir eftir bílasprengjur í Kína

Að minnsta kosti sjö eru látnir og fjórtán slasaðir eftir mikla sprengingu á í bænum Aksu á Xinjiang svæðinu í Kína í morgun. Sagt er að þrjár bifreiðar hafi sprungið á brú á svæðinu en einn maður hefur verið handtekinn í tengslum við málið.

Færeyskt skip gat ekki landað

Meira en fimmtíu bálreiðir mótmælendur komu í veg fyrir að færeyskir sjómenn gætu landað makrílafla í bænum Peterhead í Skotlandi í fyrrakvöld. Seint um kvöldið gáfust Færeyingarnir upp og sigldu úr höfn.

Bauð Þjóðverjum að eignast Danmörku

Kristján níundi Danakonungur, sá hinn sami og gaf Íslendingum stjórnarskrá árið 1874, bauð Þjóðverjum að eignast alla Danmörku sumarið 1864, þegar Danir höfðu tapað stríði við Þjóðverja út af héruðunum Slésvík og Holtsetalandi.

80 prósent af olíunni enn í flóanum

Vísindamenn við Georgíuháskóla í bandaríkjunum fullyrða að um áttatíu prósent af olíunni, sem lak úr borholu á botni Mexíkóflóa sé enn í flóanum og geti haft mikil áhrif á þörunga og annað líf í flóanum.

Þrír létust er skip sökk á tíu mínútum

Þrír létu lífið þegar að Oyang 70, suður-kóereskt fiskiskip sökk í morgun fjögur hundruð mílum austur af Suður-Nýja Sjálandi. Fimmtíu og einn var um borð í bátnum þegar hann sökk en þriggja er enn saknað. Fjörutíu og fimm skipverjum var bjargað en þeir eru flestir frá Indónesíu.

Kona í ísraelska hernum hefur fengið líflátshótanir

Fyrrum hermaður í ísraelska hernum sem setti myndir af sér með palestínskum föngum inn á Fésbókarsíðu sína segist hafa fengið líflátshótanir í kjölfar myndbirtingarinnar en myndirnar hafa vakið hörð viðbrögð víða um heim.

47 létust í rútuslysi á Filippseyjum

Smárúta með 47 innanborðs steyptist í hundrað metra djúpt gljúfur á Filippseyjum í nótt er hún var á leiðinni til San Fernando borgar. Talið er að minnsta kosti 39 eru látnir.

Staðfesta leynileg fangelsi CIA

Bandaríska leyniþjónustan CIA hefur í fórum sínum upptökur af yfirheyrslum yfir Ramzi Binalshibh, sem fóru fram í leynilegu fangelsi á vegum Bandaríkjamanna í Marokkó árið 2002.

Samkynhneigðir þurfa að bíða

Samkynhneigð pör í Kaliforníu, sem höfðu búið sig undir að ganga í hjónaband nú í vikunni, þurfa að bíða lengur.

Elísabet verði síðasta drottning Ástrala

Julia Gillard, forsætisráðherra Ástralíu, vill slíta tengslin við breska konungdæmið þegar Elísabet drottning verður öll.

Þrettán ára drengur hengdi sig fyrir slysni vegna netæðis

Hinn þrettán ára gamli Harry Robinson, hengdi sig fyrir slysni í janúar síðastliðnum. Rannsókn lögreglunnar í Essex í Bretlandi leiddi í ljós að Harry hafði ætlað að láta líða yfir sig. Það gerði hann með því að vefja handklæði, sem var fast í sturtuhengi, utan um hálsinn á sér. Svo virðist sem hann hafi misst fótana og kafnað.

Kona í ísraelsher í klandri vegna Facebook myndar

Eden Aberjil fyrrum hermaður hjá ísraelska hernum setti myndir inn á Fésbókar-síðu sína þar sem hún stiltti sér upp með palestínskum föngum. Við eina myndina þar sem hún sést fyrir framan þrjá fanga sem allir eru með bundið fyrir augun og einn bundinn á höndum, stendur: „Herinn - besti tími lífs míns".

Douglas með æxli í hálsi

Hollywood leikarinn Michael Douglas hefur hafið átta vikna lyfjameðferð vegna æxlis sem uppgötvaðist í hálsi. Samkvæmt talsmanni hans gera læknar ráð fyrir því að hann muni ná fullum bata en Douglas sjálfur segist vera bjartsýnn á að æxlið fari.

Sprengdi sig í loft upp í Bagdad

Að minnsta kosti 41 létu lífið í sjálfsmorðssprengjuárás í Írak í morgun. Yfir hundrað eru særðir en sprengjan var sprengd þar sem í höfuðborg landsins, Bagdad.

Setti fangamyndir á Facebook

Ísraelsk hernaðaryfirvöld og palestínsk stjórnvöld gagnrýndu í gær harðlega fyrrverandi hermann í ísraelska hernum sem birti myndir af sjálfum sér með palestínskum föngum á Facebook-síðu sinni.

Fá fjögurra mánaða lokafrest

Hamid Karzai, forseti Afganistans, hefur gefið út tilskipun um að einkarekin öryggisgæslufyrirtæki verði að leggja niður alla starfsemi sína í landinu. Fá þau fjögurra mánaða frest til þess.

Gates íhugar að hætta að ári

Robert Gates, varnarmálaráðherra Bandaríkjanna, hyggst láta af embætti á næsta ári.

Brotnaði í tvennt í lendingu

Boeing 737 þota hrapaði í lendingu við eyna San Andres í Karabíska hafinu í nótt. Flugvélin brotnaði í tvennt að því er fram kemur á vef Danmarks Radio. Lögreglan á staðnum segir að hið minnsta einn hafi farist og 114 slasast í brotlendingunni.

Rigningin verður Dönum dýrkeypt

Úrhellisregnið sem gekk yfir Kaupmannahöfn og norðurhluta Sjálands um helgina mun verða Dönum kostnaðarsamt. Ekki liggur hins vegar fyrir hversu mikill kostnaðurinn verður fyrir íbúða- og sumarbústaðaeigendur, segir Jyllands Posten.

Boxari grunaður um morð í Taílandi

Lögreglan á eyjunni Phuket á Taílandi leitar nú að breska tæ-boxaranum Lee Aldhouse sem grunaður er um að hafa stungið bandarískan ferðamann ítrekað með eggvopni með þeim afleiðingum að hann lést.

Fékk prest á sjúkrahúsið

Ungverska leikkonan Zsa Zsa Gabor er við dauðans dyr samkvæmt upplýsingum frá talsmanni hennar og hefur hún beðið um að fá að hitta prest til sín á sjúkrahúsið. Það þykir benda til þess að hún eigi ekki langt eftir. Hún var lögð inn á sjúkrahús fyrir helgi vegna tveggja blóðtappa.

Sagður úr tengslum við fólk

Yfirlýsingar Baracks Obama Bandaríkjaforseta, um að hann hafi hreint ekkert að athuga við það að múslimar reisi sér mosku rétt hjá „Ground zero“, staðnum þar sem Tvíburaturnarnir í New York stóðu, hafa vakið hörð viðbrögð sumra hægrimanna í Bandaríkjunum.

Þjóðir heims bregðist hratt við

Framkvæmdastjóri Sameinuðu þjóðanna segist aldrei hafa orðið vitni að neinu í líkingu við hörmungarnar í kjölfar flóðanna í Pakistan. Hann segir að þjóðir heims verði að bregðast hratt við og veita Pakistönum alla þá aðstoð sem hugsast geti.

Vanhæfum forseta kennt um

Bandaríska rannsóknarstofnunin RAND dregur upp ófagra mynd af ástandinu á Haítí, rúmu hálfu ári eftir að jarðskjálftinn mikli reið þar yfir.

Baðst afsökunar á þjáningum

Hvorki Naoto Kan forsætisráðherra né neinn ráðherra í ríkisstjórn hans lagði leið sína að minnismerki um japanskar stríðshetjur í gær, þegar þess var minnst að 65 ár eru liðin frá lokum seinni heims­styrjaldarinnar.

Étin lifandi af bakteríum

Bandarísk hjúkrunarkona, Sandy Wilson, vaknaði vorið 2005 fárveik á sjúkrahúsi í Baltimore sem hún hafði áður starfað á. Hún hafði smitast af sjaldgæfri sýkingu, sem hreinlega át upp líffærin í kviðarholi hennar hvert af öðru.

Látinna minnst í Kína

Nú er staðfest að 1239 hafi farist í aurskriðum í Zhouqu í Gansu-héraði í Kína um síðustu helgi. 505 íbúar bæjarins eru ófundnir. Fórnarlamba aurskriðnanna var minnst víðsvegar um Kína í dag.

Mun aldrei gleyma eyðileggingunni

„Ég mun aldrei gleyma eyðileggingunni og þeirri þjáningu sem ég hef orðið vitni að í dag,“ sagði Ban Ki-moon, framkvæmdastjóri Sameinuðu þjóðanna, við fréttamenn eftir að hafa farið um flóðasvæðin í Pakistan í dag. Hrikaleg flóð hafa valdið gríðarlegu tjóni í landinu undanfarna daga. Yfirvöld í Pakistan telja að 20 milljónir íbúa hafi misst heimili sín.

Sprengjuhótun á kaþólskri hátíð

Franska lögreglan rýmdi fyrr í dag svæði í kringum fjölfarinn ferðamannastað í bænum Lourdes í Frakklandi í kjölfar sprengjuhótunar. Lögreglu barst tilkynning um að fjórar sprengjur myndu springa klukkan eitt eftir hádegi í grennd við helli í bænum sem er helgur staður í augum margra kaþólikka.

Skartgripum og lúxusúrum stolið í London

Brotist var inn í tvær verslanir í miðborg London í gærkvöldi og skartgripum og úrum stolið. Þjófarnir eru ófundnir en ekki liggur fyrir hversu mikið þeir höfðu upp úr krafsinu.

Átta létust þegar kappakstursbifreið ók á hóp áhorfenda

Mikill harmleikur átti sér stað í Kaliforníu þegar að minnsta kosti 8 létust og 12 slösuðust þegar kappakstursbifreið var ekið inn í hóp áhorfenda á vinsælum kappakstri, California 200, í Mojave eyðimörkinni í Suður-Kaliforníu í nótt, að því er fram kemur á vef BBC. Margir hinna slösuðu voru fluttir með sjúkraþyrlum á spítala.

Allt hjálparstarf verði samræmt

Ban Ki-moon, framkvæmdastjóri Sameinuðu þjóðanna, sem kom til Pakistan í morgun segir að allur heimurinn standi við bakið á Pakistan og krefst þess að allt hjálparstarf handa þeim sem illa hafa orðið úti úr flóðunum í landinu verði samræmt.

Málglaðir á dollunni

Sex af hverjum tíu aðspurðum hafa talað í GSM síma á meðan þeir sátu á klósettinu, samkvæmt niðurstöðum nýrrar skoðanakönnunar sem danska markaðsfyrirtækið Wilke gerði þar í landi. Í sömu könnun var þriðjungi aðspurðra sama þótt sá sem þeir töluðu við sæti á dollunni.

Heimsækir flóðasvæðin í Pakistan

Ban Ki-moon, framkvæmdastjóri Sameinuðu þjóðanna, heimsækir Pakistan um helgina en hrikaleg flóð hafa valdið gríðarlegu tjóni í landinu að undanförnu. Raza Gilani, forsætisráðherra landsins, sagði í ávarpi í tilefni þjóðhátíðardags Pakistans fyrr í dag að 20 milljónir manna hafi misst heimili sín í flóðunum en áður höfðu Sameinuðu þjóðirnar sagt að 14 milljónir íbúa landsins væru heimilislausir.

Milljónir hafa misst heimili sín

Forsætisráðherra Pakistans segir að um 20 milljón manna hafi misst heimili sín í flóðunum. Búist er við að flóðin muni færast í aukana í suðurhluta landsins nú um helgina. Mjög er óttast að farsóttir breiðist út með menguðu vatni, þar sem fólk hefur leitað sér skjóls í tjaldbúðum. Búið er að staðfesta að minnsta kosti eitt kólerutilfelli.

Meira rignir ofan í flóðin

Ár flæddu enn yfir bakka sína og nýjar aurskriður ollu tjóni á hamfarasvæðunum í Kína, þar sem enn meiri rigningu er spáð næstu daga. Ástandið er verst í Gansu-héraði í norðvestanverðu Kína, þar sem á annað þúsund manns hafa farist og tugir þúsunda þurft að yfirgefa heimili sín.

Eldsneytið sent í næstu viku

Rússar ætla í næstu viku að útvega eldsneyti í fyrsta kjarnorkuver Írans þrátt fyrir harða andstöðu Bandaríkjamanna, sem vilja koma í veg fyrir að Íranar geti framleitt kjarnorku nema þeir hafi fyrst fært sönnur á að þeir ætli ekki að koma sér upp kjarnorkuvopnum.

Íbúarnir allir sendir úr landi

Meira en 40 búðir sígauna hafa verið rýmdar í Frakklandi á síðustu tveimur vikum. Um 700 íbúar þeirra verða sendir úr landi til Búlgaríu eða Rúmeníu með flugi.

Dómari leyfir hjónaböndin

Vaughn R. Walker, yfirhéraðsdómari í Kaliforníu, sá hinn sami og fyrir skemmstu kvað upp þann dóm að bann við hjónaböndum samkynhneigðra brjóti í bága við stjórnarskrá ríkisins, hafnaði í gær beiðni um að gildistöku dómsins verði frestað þangað til áfrýjunardómstóll ríkisins hefur tekið á málinu.

Neituðu sér um úrvalsviský

Þegar Ernest Shackleton fór í könnunarleiðangur á Suðurheimsskautið árið 1907 hafði hann meðferðis 11 flöskur af skosku viský. Hann náði hins vegar aldrei að smakka á guðaveigunum. Viskýflöskurnar, sem eru merktar McKinley & Co, fundust í kössum í ísnum á Suðurheimsskautinu þegar fornleifafræðingar frá Nýja-Sjálandi rannsökuðu vegsummerki eftir Shackleton og félaga fyrir fjórum árum síðan.

Blaðamenn fordæma WikiLeaks

Samtökin Blaðamenn án landamæra hafa skrifað WikiLeaks opið bréf þar sem þau gagnrýna harðlega birtingu á 70 þúsund leyniskjölum bandaríska hersins um stríðið í Afganistan.

Bandarískur fangi fékk milljarð í skaðabætur

Rúmlega 61 árs gamall Bandaríkjamaður sem setið hefur 24 ár í fangelsi fyrir glæp sem hann framdi ekki hefur fengið 8 milljón dollara eða rétt tæpann milljarð króna í skaðabætur.