Átta létust þegar kappakstursbifreið ók á hóp áhorfenda

Mikill harmleikur átti sér stað í Kaliforníu þegar að minnsta kosti 8 létust og 12 slösuðust þegar kappakstursbifreið var ekið inn í hóp áhorfenda á vinsælum kappakstri, California 200, í Mojave eyðimörkinni í Suður-Kaliforníu í nótt, að því er fram kemur á vef BBC. Margir hinna slösuðu voru fluttir með sjúkraþyrlum á spítala.

Kappaksturinn er 80 kílómetra utanvegakappakstur en tugir þúsunda áhorfenda voru mættir til að fylgjast með. Flestir áhorfendanna standa við jaðar leiðarinnar og fylgjast með án þess að grindverk eða aðrar varnir séu á milli þeirra og þátttakenda í kappakstrinum. Vitni að slysinu segist hafa séð konu með mikla höfuðáverka liggja í blóði sínu á meðan annar áhorfandi var fastur undir bíl.

Kappaksturinn er haldinn á svæði sem nefnist Soggy Dry Lake Bed í 165 kílómetra fjarlægð frá Los Angeles.