Þingið gengur gegn vilja Bush

George W. Bush gæti beitt neitunarvaldi sínu í fyrsta sinn samþykki Bandaríkjaþing að afnema takmarkanir á opinberum fjárframlögum til stofnfrumurannsókna. Fulltrúadeildin hefur fyrir sitt leyti lagt blessun sína yfir það.

Draga úr þróun kjarnorkuvopna

Íranar munu halda áfram að draga úr þróun kjarnorkuvopna að sögn Jack Straw, utanríkisáðherra Bretlands. Straw lýsti þessu yfir í dag eftir að hafa setið þriggja tíma fund með forsvarsmönnum kjarnorkumála í Íran, ásamt utanríkisráðherrum Þýskalands og Frakklands, þar sem málið var rætt ítarlega.

Átti að skjóta vélina niður

Varnarmálaráðherra Bandaríkjanna, Donald Rumsfeld, gaf hernum leyfi til að skjóta niður Cessnu-vél sem flaug yfir Washingtonborg þann 11. maí síðastliðinn. <em>Washington Post</em> greinir frá þessu í dag.

Fimm látnir úr veikinni í Noregi

Í Noregi fjölgar hermannaveikitilfellum ennþá. Þar hafa nú þrjátíu og fimm greinst með veikina, þar af einn í dag. Fimm eru látnir.

Fleiri Palestínumenn deyja

Í ársskýrslu Amnesty kemur fram að ísraelskar hersveitir hafi fellt að minnsta kosti 700 Palestínumenn á síðasta ári og þar af að minnsta kosti 150 börn. Í skýrslunni segir að lunginn af þessu mannfalli hafi orðið í gálausum skotárásum og loftárásum á íbúðabyggðir óbreyttra borgara.

Kaspíahafsolíu dælt vestur

Forsetar Aserbaídsjans, Georgíu og Tyrklands opnuðu í gær, við hátíðlega athöfn í Sangachal suður af Bakú, fyrir flutning jarðolíu um nýja leiðslu frá olíulindunum við Kaspíahaf til útflutningshafnar á Miðjarðarhafsströnd Tyrklands.

Íranar fallast á kröfur ESB

Fulltrúar Íransstjórnar endurnýjuðu í gær heit sitt um að stefna ekki að því að koma sér upp kjarnorkuvopnum. Evrópuríkin höfðu þrýst mjög á Írana að lýsa þessu yfir og í viðræðum tengslahóps Evrópusambandsins, skipuðum utanríkisráðherrum mestu þungavigtarríkja þess, við fulltrúa Írans í Genf í gær fékkst þessi niðurstaða.

Reyndu að búa til geislasverð

Tveir aðdáendur Stjörnustríðsmyndanna í Bretlandi, tvítugur piltur og 17 ára stúlka, liggja stórslasaðir á sjúkrahúsi eftir að hafa reynt að smíða sér geislasverð. Innblásið af ævintýrum Loga geimgengils og Svarthöfða ákvað parið að smíða sér geislasverð með því að fylla hylki af flúorljósaperum með bensíni. 

Schröder vill keyra á persónukjör

Í fyrsta blaðaviðtalinu sem Gerhard Schröder, kanslari Þýskalands, veitti eftir að hann lýsti því yfir að hann vildi flýta kosningum til Sambandsþingins segist hann vilja "mjög persónumiðaða" kosningabaráttu.

Létust í umferðarslysi á Írlandi

Fimm skólastúlkur létu lífið í árekstri skólabíls og tveggja fólksbíla á Írlandi í gær. Alls voru 50 börn í rútunni og eru sex þeirra talin lífshættulega slösuð en einungis eitt barn slapp óslasað úr skólabílnum sem valt á hliðina. Lögreglan segir að stúlkurnar sem létust hafi verið á aldrinum þrettán til sextán ára en orsök slyssins eru ekki kunn þó mikil rigning hafi eflaust átt sinn þátt í að slysið hafi orðið.

Alvarlegasta tilfellið í mörg ár

Hermannaveikin sem komin er upp í Noregi er alvarlegasta tilfellið á Norðurlöndum í mörg ár. Óttast að tvöfalt fleiri eigi eftir að veikjast innan fárra daga og þeim sem deyja af völdum veikinnar eigi eftir að fjölga um helming. Nú hafa 93 verið lagðir inn á Östfold-sjúkrahúsið í Fredrikstad vegna gruns um lungnabólgu og staðfest er að 29 þeirra eru með hermannaveikina. Af þeim eru fimm dánir.

Einn blóðugasti dagurinn í Írak

Írakskir borgarar upplifðu einn blóðugasta dag í tæpt ár í gær en að minnsta kosti 50 Írakar létu lífið í sprengjutilræðum víðs vegar um landið. Rúmlega 600 manns, þar af 50 bandarískir hermenn, hafa fallið í landinu frá því uppreisnarmenn blésu til sóknar í kjölfar myndunar nýrrar ríkisstjórnar landsins í apríl síðastliðnum.

Hugðist selja al-Qaida sprengiefni

68 ára gamall Bandaríkjamaður hefur verið handtekinn fyrir að reyna að selja, að hann hélt, félaga í al-Qaida sprengiefni. Sá síðari reyndist þó vera fulltrúi frá alríkislögreglunni þar í landi og var maðurinn sem fyrr segir handtekinn. Ef maðurinn verður sakfelldur gæti hann átt yfir höfði sér allt að fimmtán ára fangelsi og sekt upp á 15 milljónir króna.

Bush og Jintao funda á árinu

George Bush Bandaríkjaforseti og Hu Jintao, leiðtogi Kína, munu heimsækja hvor annan á þessu ári. Bush hefur ekki verið vinsæll hjá kínverskum yfirvöldum til þessa en í upphafi fyrra kjörtímabilsins síns sagði hann að hann myndi gera allt til að hjálpa Taívan til að verjast ágangi Kína í baráttu sinni til sjálfstæðis.

Staðfestir brottför Sýrlandshers

Kofi Annan, framkvæmdastjóri Sameinuðu þjóðanna, hefur staðfest að sýrlenskir hermenn og leyniþjónustumenn séu farnir frá Líbanon. Annan tilkynnti þetta á blaðamannafundi í morgun. Annan sagði fréttamönnum að hann gæti staðfest að brottflutningnum væri lokið alls staðar í landinu og að það ætti einnig við um landamærahéruð ríkjanna.

Flóð í suðurhluta Kína

Mikil rigning hefur verið í suðurhluta Kína að undanförnu með tilheyrandi flóðum. Björgunarsveitir hafa verið uppteknar við að hjálpa fólki víðs vegar um svæðið en samgöngur hafa gengið brösuglega vegna flóðanna sem enn hafa þó ekki haft alvarlegar afleiðingar í för með sér. Búist er við áframhaldandi rigningu á næstu dögum og undirbúa yfirvöld sig fyrir að ástandið versni.

Niðurgeiða Viagra fyrir glæpamenn

Um 200 dæmdir kynferðisafbrotamenn í New York ríki í Bandaríkjunum hafa fengið stinningarlyfið Viagra sér að kostnaðarlausu. Mennirnir, sem allir eru taldir líklegir til að brjóta af sér á nýjan leik, hafa nýtt sér Medicaid-kerfið sem virkar á þann veg að skattborgarar greiða niður lyf fyrir þá sem minna mega sín.

Óttast að tvöfalt fleiri látist

Hermannaveikin, sem blossað hefur upp í Noregi á síðustu sólarhringum, er alvarlegasta tilfelli veikinnar á Norðurlöndum í mörg ár. Óttast er að fjöldi látinna og veikra tvöfaldist á næstu dögum.

Kemst upp um barnaníðinga á Ítalíu

Lögreglan á Ítalíu hefur yfirheyrt 186 manns, þar á meðal þrjá presta, eftir að upp komst um vefsíðu barnaníðinga á Netinu. Þar voru vistaðar myndir sem sýna börn á aldrinum fjögurra til átta ára pyntuð og beitt kynferðislegu ofbeldi. Auk þriggja presta kaþólsku kirkjunnar eru borgarstjóri, kennari og læknir meðal þeirra sem nýttu sér aðgang að síðunni.

Mannvíg halda áfram í Bagdad

Tveir Írakar létust í morgun þegar bílasprengja reið af við fjölfarna götu í Bagdad. Að minnsta kosti átta liggja sárir. Rúmlega 600 manns, þar af fimmtíu bandarískir hermenn, hafa fallið í landinu frá því uppreisnarmenn blésu til nýrrar sóknar í kjölfar myndunar nýrrar ríkisstjórnar landsins í síðasta mánuði.

Handtóku mannréttindafrömuð

Stjórnvöld í Úsbekistan hafa handtekið mannréttindafrömuð sem greindi fréttamönnum frá því þegar úsbekskar hersveitir skutu á og drápu mótmælendur í borginni Andijan um miðjan mánuðinn. Frá þessu greina mannréttindasamtökin Huma Rights Watch og krefjast þess að manninum verði sleppt tafarlaust. Samtökin segja að yfirvöld í Úsbekistan reyni með þessu hindra að umheimurinn fái nákvæmar lýsingar á því sem gerðist 13. maí í Andijan.

Auka framlög til þróunarmála

Aðildarríki Evrópusambandsins samþykktu í dag að auka framlög sín til þróunarmála til þess að styðja við baráttu Sameinuðu þjóðanna gegn fátækt í heiminum. Fimmtán eldri aðildarþjóðirnar stefna að því að verja að minnsta kosti 0,51 prósenti af þjóðartekjum til hjálparstarfs árið 2010 og 0,7 prósentum af tekjunum fimm árum síðar, en Danir, Svíar, Hollendingar og Lúxemborgara hafa þegar náð þessum markmiðum.

Sjö hermenn falla í Írak

Sjö bandarískir hermenn féllu í Írak í dag í tveimur sprengjuárásum. Í fyrri árásinni létust þrír hermenn á eftirlitsferð í miðborg Bagdad þegar bílsprengja sprakk nærri ökutæki þeirra. Skömmu síðar var greint frá því að fjórir hermenn hefðu látist í árás í bænum Haswa suður af höfuðborginni.

Sæðisþóknun verði ekki skattskyld

Rekstaraðilar sæðisbankans Cryos í Árhúsum í Danmörku hafa skorað á Kristian Jensen, fjármálaráðherra, að afturkalla kröfu danskra skattayfirvalda um að sæðisgjafar þurfi að greiða skatt af þóknuninni sem þeir fá fyrir framlag sitt. Bankastjórarnir óttast að þetta verði til þess að mun færri sæðisgjafar fáist, ekki bara vegna peninganna heldur ekki síður vegna þess að margir vilja gefa nafnlaust og það er ekki hægt ef skattayfirvöld þurfa að fá allar upplýsingar um gjafana.

Færri smitaðir en óttast var

Heilbrigðisyfirvöld í Östfold í Noregi telja nú að færri séu smitaðir af hermannaveiki en óttast var í gær, en þá var talið að fjöldi veikra og látinna myndi hugsanlega tvöfaldast. Alls hafa 33 af þeim rúmlega hundrað, sem leitað hafa til Östfold-sjúkrahússins vegna gruns um smit, greinst með veikina og hafa fimm þeirra látist. Hins vegar hafa aðeins tveir leitað til sjúkrahússins með einhver einkenni frá því snemma í morgun og það bendir til þess færri séu smitaðir en talið var áður.

Segja al-Zarqawi sáran

Hópur á vegum al-Qaida samtakanna í Írak greindi frá því í dag að Abu Musab al-Zarqawi, leiðtogi samtakanna í landinu, væri særður. Í yfirlýsingu frá hópnum sem birt var á heimsíðu íslamskra öfgamanna kemur þetta fram en þar eru múslímar hvattir til að biðja fyrir leiðtoganum. Ekki hefur fengist staðfest hvort yfirlýsingin er ófölsuð.

Mænusóttarfaraldur í Jemen

Mænusóttarfaraldur geisar nú í Jemen og hafa 108 börn þegar lamast af hennar völdum, samkvæmt upplýsingum fréttastofu <em>Reuters</em>. 14 tilfelli hafa einnig greinst í Indónesíu. Bólusetningarherferð er að fara af stað en sjúkdómsins hefur ekki orðið vart í þessum löndum í meira en áratug. Veiran leggst á heila og mænu, einkum hjá börnum undir fimm ára aldri, og getur lamað þau á nokkrum klukkustundum og jafnvel dregið þau til dauða.

Sharon vill sleppa fleiri föngum

Ariel Sharon, forsætisráðherrra Ísraels, greindi frá því í dag að hann hygðist leggja það til við ríkisstjórn sína að sleppa 400 palestínskum föngum í frekari viðleitni til þess að koma friði fyrir botni Miðjarðarhafs. Sharon er nú staddur í Washington og á fundi með bandarískum stuðningsmönnum Ísraels í dag lýsti hann því enn fremur yfir að traustið milli Ísraela og Palestínumanna myndi aukast ef fyrirhugaður brottflutningur gyðinga úr landnemabyggðum á Gasaströndinni myndi heppnast vel.

Rýma byggðir vegna eldgoss

Stjórnvöld í Kólumbíu gáfu út fyrirmæli um það í dag að um níu þúsund íbúar í hlíðum eldfjallsins Galeras skyldu fluttir á brott þar sem vísindamenn búast við að fjallið fari að gjósa. Nokkur skjálftavirkni hefur verið á svæðinu og telja vísindamenn að gos geti hafist innan nokkurra daga eða vikna.

Hátt í 100 á spítala vegna veiki

Þeir nálgast hundraðið, sem lagðir hafa verið inn á sjúkrahús í Noregi vegna gruns um hermannaveiki. Veikin sem blossaði upp í Fredrikstad er alvarlegasta tilfelli hennar á Norðurlöndum í mörg ár.

Stakk þrjá menn á lestarstöð

Maður vopnaður hnífi gekk berserksgang á neðanjarðarlestarstöð í Stokkhólmi í gærkvöld og stakk þrjá menn. Einn þeirra er illa særður. Vitni segja að þær fimmtán mínútur sem liðu áður en lögregla náði að handsama manninn hafi verið líkastar martröð. Ekki er ár liðið síðan sami maður stakk fólk á annarri lestarstöð í borginni.

Leigumóðir seldi barn á Netinu

Belgísk leigumóðir seldi þriðja aðila barnið á Netinu án vitundar blóðforeldranna. Þá hafði hún reynt að koma barninu í verð hjá enn öðru pari.

Ormagöngin óhentug

Breskir og bandarískir vísindamenn hafa komist að þeirri niðurstöðu að svonefnd ormagöng séu ekki hentug til tímaferðalaga.

Kalam kemur í heimsókn

Dr. A.P.J. Abdul Kalam, forseti Indlands, kemur í opinbera heimsókn til Íslands í boði forseta Íslands á sunnudaginn kemur og mun dvelja hér til 1. júní.

Tölvuþrjótar gerast æ kræfari

Tölvuþrjótar hafa fundið enn eina aðferðina til að gera tölvunotendum lífið leitt. Til viðbótar við vírus- og ormasendingar eru þeir farnir að ástunda að læsa skjölum í tölvum fólks og heimta lausnargjald fyrir að opna þau aftur.

Al-Zarqawi sagður særður

Á vefsíðu sem al-Kaída í Írak hefur notað til að birta yfirlýsingar sínar birtust í gær fregnir um að Jórdaninn Abu Musab al-Zarqawi, leiðtogi þeirra, hefði særst í árás.

Barnaklámhringur upprættur

Ítalska lögreglan handtók í gær 186 menn sem grunaðir eru um að tilheyra barnaklámhring. Í hópnum eru þrír kaþólskir prestar.

Vígvæðingin heldur áfram

Herskáir hópar norður-írskra lýðveldissinna ráða enn í sínar raðir menn sem þeir síðan þjálfa í vopnaburði og meðferð sprengiefna.

Sprengt við stúlknaskóla

Ofbeldið í Írak hélt áfram í gær sem aldrei fyrr. Sex Írakar dóu í sprengingu fyrir utan barnaskóla í Bagdad í gær og sjö bandarískir hermenn biðu bana í árásum í eða við höfuðborgina.

800 þúsund börn týnast árlega

Tvö óhugnanleg sakamál þar sem börn eru fórnarlömbin hafa vakið mikla athygli í Bandaríkjunum og víðar að undanförnu. Slíkir harmleikir eru þó því miður ekki einsdæmi.

Töldu sig hafna yfir lög

Hæstiréttur Pitcairn-eyju hefur hafnað beiðni sex manna á Pitcairn-eyju í Kyrrahafi um að máli þeirra verði vísað frá.

Ráðist gegn ópíumbændum

Eftir að hafa sætt ámæli fyrir að draga lappirnar í baráttunni við ópíumræktendur hafa afgönsk yfirvöld blásið til stórsóknar síðustu daga.

Reyndu að bera klæði á vopnin

Leiðtogar rétttrúnaðarkirkjunnar settust í gær á rökstóla í Istanbúl, hinni fornu höfuðborg aust-rómverska keisaradæmisins, og reyndu að leysa þann djúpstæða ágreining sem ríkir í orþódoxu kirkjunni í Ísrael.

Ráðherra rauf heimsókn til Japans

Wu Yi, varaforsætisráðherra Kína, rauf skyndilega opinbera heimsókn sína til Japans á mánudag og afboðaði fund sem þá stóð til að hún ætti með Junichiro Koizumi, forsætisráðherra Japans. Innt eftir skýringum á þessu tilgreindi Kínastjórn í gær reiði vegna heimsókna japanskra ráðamanna í hof þar sem minning japanskra herforingja er heiðruð.

NATO býður aðstoð í Darfur

Jaap de Hoop Scheffer, framkvæmdastjóri Atlantshafsbandalagsins, greindi frá því í gær að bandalagið hefði ákveðið að bjóða Afríkusambandinu (AU) ýmsa aðstoð við friðargæsluverkefni þess í Darfur-héraði í Súdan.