Hátt í 100 á spítala vegna veiki

Þeir nálgast hundraðið, sem lagðir hafa verið inn á sjúkrahús í Noregi vegna gruns um hermannaveiki. Veikin sem blossaði upp í Fredrikstad er alvarlegasta tilfelli hennar á Norðurlöndum í mörg ár. Staðfest er að 33 sjúklinganna eru með hermannaveiki. Fimm eru látnir og átta manns er vart hugað líf. Norsk heilbrigðisyfirvöld vona að það versta sé afstaðið og að faraldurinn hafi náð hámarki sínu. Sjúkrahúsið í Fredrikstad er orðið yfirfullt og sjúklingar eru sendir til sjúkrahúsa í nágrannabæjum. Enn er ekkert vitað um smitsleið bakteríunnar. Líklegast var talið að hún væri loftræstikerfi einhverrar byggingar í Fredrikstad en eftir að ferðir sjúklinganna voru kortlagðar og sýni tekin úr loftræstikerfum finnst enginn samnefnari. Fólkið virðist hafa smitast á stóru svæði, svo stóru að líkur eru taldar á að smitleiðin sé í gegnum kæliturna sem blása lofti utandyra. Jafnvel er talið að bakterían hafi borist um loftrásir nokkurra bygginga. Reglur gilda um meðferð slíkra loftræstikerfa og komi í ljós að smit hafi borist um kerfi sem ekki var hirt um að hreinsa gæti eigandi byggingarinnar verið sóttur til saka. Þar til komist verður að upptökum sýkinnar hefur landlæknir í Noregi skorað á eldra fólk að halda sig fjarri verslunarmiðstöðvum í Fredrikstad og Sarpsborg. Þá hefur því einnig verið beint til foreldra að fara ekki með börn sín í verslunarmiðstöðvar.