Óttast að tvöfalt fleiri látist

Hermannaveikin, sem blossað hefur upp í Noregi á síðustu sólarhringum, er alvarlegasta tilfelli veikinnar á Norðurlöndum í mörg ár. Óttast er að fjöldi látinna og veikra tvöfaldist á næstu dögum. 93 hafa lagst inn á Östfold-sjúkrahúsið í Fredrikstad vegna lungnakvilla, en á þau leggst hermannaveiki. Staðfest hefur verið að 29 sjúklinganna eru með sjúkdóminn. Þar af eru fimm látnir. Óttast er um líf átta sjúklinga til viðbótar en flestum þeirra er nú haldið í öndunarvél. Neyðarástand er að skapast á sjúkrahúsinu í Fredrikstad. Í morgun hafa sex manneskjur, sem grunur leikur á að hafi smitast af bakteríunni, verið lagðar inn. Gerðar hafa verið rástafanir um að flytja tuttugu sjúklinga til stofnana í nágrannabæjum í dag til að rýma fyrir nýsmituðum. Starfsfólk Östfold-sjúkrahússins segir að ef ekki dragi úr nýkomum muni þau einungis geta sinnt fólkinu næsta sólarhring. Þá verði sjúkrahúsið yfirfullt. Enn er ekkert vitað fyrir víst hver upptök smitsins eru þótt talið sé að bakterían hafi borist um loftræstikerfi. Það tekur að minnsta kosti þrjá daga að komast að því um hvaða byggingu ræðir og reynt er að kortleggja ferðir sjúklinganna til að finna einhvern samnefnara. Þar til komist verður að upptökum sýkingarinnar hefur landlæknir í Noregi skorað á eldra fólk að halda sig fjarri verslunarmiðstöðvum í Fredrikstad og Sarpsborg. Þá hefur því einnig verið beint til foreldra að fara ekki með börn sín í verslunarmiðstöðvar.