800 þúsund börn týnast árlega

Tvö sakamál þar sem börn eru í aðalhlutverki hafa vakið mikinn óhug í Bandaríkjunum og víðar. Í öðru málinu fannst barnið á lífi en því hafði verið misþyrmt en í hinu er tveggja systkina saknað eftir að nánustu ættingjum þeirra hafði verið banað. Hátt í átta hundruð þúsund bandarísk börn voru skráð týnd árið 1999. Á sunnudaginn var fannst átta ára gömul stúlka grafin undir grjóthrúgu í ruslagámi í bænum Lake Worth í Flórída. Það má teljast kraftaverk að hún fannst á lífi því lögreglumaður sá fyrir tilviljun glitta í fingurgóma hennar í hrúgunni. Í ljós kom að telpunni hafði verið nauðgað af unglingspilti sem hafði dvalið á heimili guðmóður hennar og hann síðan skilið hana eftir til að deyja. Þegar hún fannst var hún í furðu góðu ásigkomulagi þrátt fyrir eldraunina. Hún bað strax um að fá að hitta prest til að þakka Guði fyrir björgunina. Illvirkinn hefur verið handtekinn og hefur hann játað á sig sök. Í Idaho-ríki er nú gerð dauðaleit að systkinunum Dylan og Shasta Groene en þau eru aðeins átta og níu ára gömul. Þeirra hefur verið saknað síðan í byrjun síðustu viku en þá fundust móðir þeirra, bróðir og stjúpfaðir myrt á heimili þeirra í bænum Coeur D'Alene. Í fyrradag hétu yfirvöld rúmum sex milljónum íslenskra króna hverjum þeim til handa sem gæti veitt upplýsingar sem leiddu til að börnin fyndust á lífi en lögreglan hefur engar áreiðanlegar vísbendingar um hverjir kynnu að hafa rænt börnunum. Faðir barnanna er ekki grunaður um verknaðinn en hann hefur verið niðurbrotinn frá því að honum var tilkynnt um málið. Þótt þessi tvö mál hafi vakið sérstaka athygli þá eru slíkir harmleikir því miður ekki einsdæmi í Bandaríkjunum. Á árinu 1999 fékk lögreglan 797.500 tilkynningar um börn sem sögð voru týnd, þar af voru 58.200 þeirra numin á brott af fólki utan fjölskyldunnar. 115 börnum var rænt af mönnum sem taldir voru hættulegir barnaræningjar og til þeirra spurðist ekkert í afar langan tíma. Ekki kemur fram hversu mörg börn komu í leitirnar heil á húfi.