Landsdómur birtir upptökur úr réttarhöldunum

Landsdómur hefur birt upptökur úr réttarhöldunum yfir Geir Haarde. Þar eru meðal annars birtar upptökur af skýrslutöku yfir Geir sjálfum og fjörtíu vitnum sem gáfu skýrslu fyrir réttinum.

Borgarahreyfingin sýknuð af kröfu Guðmundar Andra

Borgarahreyfingin var í dag sýknuð af kröfu Guðmundar Andra Skúlasonar um greiðslu á um tveimur milljónum króna vegna ógreiddra launa. Dómurinn var kveðinn upp í Héraðsdómi Reykjavíkur. Guðmundur var ráðinn tímabundið starfsmaður Borgarahreyfingarinnar í fyrra en var síðan sagt upp áður en ráðningasamningurinn var runnin út. Guðmundur taldi að uppsögnin hefði verið tilefnislaus og krafðist ógreiddra launa.

Starfsfólkið náði að forða sér út í tæka tíð

Slökkviliðsmenn vinna enn að því að ráða niðurlögum elds sem kom upp í söluskálanum Bláa Turninum á Háaleitisbraut rétt fyrir klukkan ellefu í morgun. Samkvæmt upplýsingum frá varðstjóra er enn eldur í þakinu en grafa var að koma á vettvang til að rífa þakið í sundur. Talið er að eldurinn hafi kviknað út frá djúpsteikingarpotti sem staðsettur er inni í eldhúsi söluskálans. Enginn slasaðist, en starfsfólk náði að forða sér út í tæka tíð, að sögn slökkviliðs.

Brotist inn á þremur stöðum - bensínþjófur á ferð

Nokkuð var um innbrot í Reykjavík í nótt. Brotist var inn í fyrirtæki við Bíldshöfða á öðrum tímanum og um klukkan þrjú fór þjófur inn hjá Samhjálp við Stangarhyl. Lögregla hafði hendur í hári manns sem grunaður er um innbrotið og verður hann yfirheyrður í dag.

Með kókaín í Hörgárdal

Lögreglan á Akureyri stöðvaði um níu leytið í gærkvöldi bíl í Hörgárdal. Tveir menn voru í bílnum og var sá sem ók grunaður um að aka undir áhrifum fíkniefna. Lögreglan framkvæmdi leit í bílnum og þar fundust um 30 til 40 grömm af kókaíni. Tekin skýrsla af mönnunum og þeir látnir lausir en mega búast við kæru. Fremur óvanalegt er að svo mikið af kókaíni finnist á Norðurlandi en reikna má með að virði efnisins slagi í 750 þúsund krónur.

Verðhækkanir mun meiri hér en á Evrusvæðinu

Heildarhækkun á vöru og þjónustu á Íslandi frá árinu 2008 og til dagsins í dag er 34,9 prósent. Á sama tíma nam hækkunin 5,6 prósentum á Evrusvæðinu. Þetta kemur fram í úttekt Já Ísland samtakanna, sem berjast fyrir inngöngu í Íslands í Evrópusambandið, en þau fengu Hagstofu Íslands til þess að gera samanburð á verðbreytingum í ýmsum vöruflokkum eftir hrun.

Mikil óvissa um orkugetu jarðvarma

Forstjóri Landsvirkjunar segir aðeins lítinn hluta þeirrar orku sem gert er ráð fyrir í nýtingarflokki Rammaáætlunar um vernd og nýtingu náttúrusvæða vera tryggan. Hann undrast að allar vatnsaflsvirkjanir séu settar í bið- eða verndarflokk, utan tveggja lítilla virkjana. Orkuframboð á Suðurlandi sé minnkað til muna.

Grásleppuveiðimenn kærðir til lögreglu

Fiskistofa hefur kært nokkra grásleppuveiðimenn til lögreglu fyrir að hafa of mörg grásleppunet í sjó.

Afturkölluðu hækkun á dísil

Olíufélögin hafa afturkallað hækkun á dísil sem gerð var um og eftir helgina. Þeir sem hækkuðu verðið voru Shell, N1 og Olís.

Sturla fundaði með Ólafi Ragnari

Forseti Íslands Ólafur Ragnar Grímsson átti fund með Sturla Jónssyni vörubílstjóra og Arngrími Pálmasyni þar sem þeir greindu frá baráttu sinni og annarra borgara við að ná fram rétti sínum gagnvart fjármálastofnunum og uppboðsaðilum, en embætti forsetans greinir frá þessu á vefsíðu embættisins, forseti.is.

Kviknaði líklega í út frá eldamennsku

Eldurinn sem kom upp í söluturninum Bláa turninum á Háaleitisbraut rétt fyrir klukkan ellefu í morgun kviknaði líklega út frá eldamennsku. Samkvæmt upplýsingum frá slökkviliðsmanni á vettvangi læsti eldurinn sig fljótlega í klæðningu undir þakinu en hann náði ekki að breiða sig út fyrir eldhúsið í skálanum.

Eldur í Bláa turninum

Eldur kviknaði í söluturninum Bláa turninum á Háaleitisbraut fyrir fáeinum mínútum. Allar stöðvar slökkviliðsins eru á staðnum. Samkvæmt upplýsingum frá vaktstjóra slökkviliðsins er um töluverðan eld að ræða. Eldurinn kviknaði út frá eldamennsku, samkvæmt upplýsingum frá slökkviliðsmanni á vettvangi.

Vill að fé á dauðum bankareikningum fari til samfélagsmála

Eygló Harðardóttir þingmaður Framsóknarflokksins vill að það fé sem nú liggur inni á dauðum bankareikningum verði notað til nýsköpunar- og samfélagsmála. Fram kom í svari við fyrirspurn Eyglóar á Alþingi að ríflega 1,5 milljarður króna væri inn á íslenskum bankareikningum sem ekki höfðu verið hreyfðir í 15 ár eða lengur.

Þóra ætlar í framboð - boðað til blaðamannafundar

Þóra Arnórsdóttir ætlar að bjóða sig fram til embættis forseta Íslands, samkvæmt heimildum Vísis. Í fréttatilkynningu frá stuðningsmönnum hennar er boðað til fundar í Hafnarborg í Hafnarfirði klukkan korter yfir fjögur í dag.

Beðið eftir sýnum frá Svíþjóð og niðurstöðum úr geðrannsókn

Gæsluvarðhald yfir karlmanni á þrítugsaldri, sem grunaður er um manndráp í Hafnarfirði í byrjun febrúar, rennur út í dag. Samkvæmt upplýsingum frá lögreglunni á höfuðborgarsvæðinu verður farið fram á áframhaldandi varðhald síðar í dag.

Vilja ákvæði inn í stjórnarskrá

Stjórn Samtakanna "78 skorar á Alþingi að gera lagaúrbætur til handa transfólki. Samtökin sendu frá sér yfirlýsingu í gær vegna þess að ungur transmaður var beittur ofbeldi á öldurhúsi í Reykjavík en fyrir þinginu liggur frumvarp um stöðu transfólks á Íslandi.

Uppsóp er þrefalt á götum borgarinnar

Vandséð er að tímaáætlanir haldi í vorhreinsun gatna í Reykjavík. Tíðarfar í vetur varð til þess að mun meira hefur safnast af sandi og drullu á götum borgarinnar. Jákvætt viðmót borgara sem færa bíla sína flýtir fyrir vinnunni.

Unga fjölskyldufólkið aftur í utanlandsferðir

Um 26.500 Íslendingar flugu af landi brott í mars. Það er um 17% aukning frá sama mánuði í fyrra. Unga fjölskyldufólkið virðist farið að ferðast aftur þó ferðamynstrið sé breytt segir forstjóri ferðaskrifstofu. Ferðirnar eru styttri.

Þóra sögð ætla að tilkynna um framboð í dag

Þóra Arnórsdóttir fréttamaður ætlar að tilkynna í dag um framboð sitt til embættis forseta Íslands. Þetta var fullyrt á mbl.is seint í gærkvöldi en þar er sagt að hún hafi þegar greint nánustu vinum sínum frá þessari ákvörðun sinni. Þóra hefur ítrekað verið nefnd sem mögulegur frambjóðandi og komið einna best út í þeim skoðanakönnunum sem gerðar hafa verið, ef frá er talinn sitjandi forseti Ólafur Ragnar Grímsson.

Íslenskur minkur étur meiri fisk

Mikilvægasta fæða íslenska minksins eru ýmsar tegundir fiska og fugla. Fæða minksins er þó mjög mismunandi eftir búsvæðum dýrsins, eftir árstíðum og kyni. Fiskur er stærri hluti fæðu minks hérlendis en í flestum sambærilegum rannsóknum erlendis.

Íslensk kúabú bæta heimsmet

Hlutfall mjólkur sem kemur frá búum með mjaltaþjóna er hæst í heimi hér á landi, eða 28,2 prósent. Frá þessu er greint á vef Landssambands kúabænda og vitnað í tölur NMSM, samtaka norrænna afurðastöva í mjólkuriðnaði.

Helsti óvissuþáttur í spá um þróun íbúðaverðs

Fjöldi íbúða í eigu fjármálastofnana er einn helsti óvissuþátturinn í spá greiningardeildar Íslandsbanka um þróun íbúðaverðs. Í lok síðasta árs voru um þrjú þúsund íbúðir í eigu fjármálastofnana, þar af 1.600 í eigu Íbúðalánasjóðs.

Fiskveiðarnar þurfi ekki að verða hindrun

„Ég er bjartsýnn á að viðræður um fiskveiðimál geti skilað hagstæðri niðurstöðu fyrir bæði Ísland og Evrópusambandið,“ segir Evrópuþingmaðurinn Christian Dan Preda í samtali við Fréttablaðið.

Hæsta sekt sinnar tegundar

Samkeppniseftirlitið hefur ákveðið að leggja 440 milljóna króna sekt á Símann fyrir brot á samkeppnislögum. 390 milljónir eru vegna misnotkunar á markaðsráðandi stöðu og brot gegn ákvæðum EES-samningsins og fimmtíu milljónir vegna rangrar og misvísandi upplýsingagjafar til yfirvalda við meðferð málsins. Sektin er sú hæsta sem lögð hefur verið á fyrirtæki á Íslandi vegna misnotkunar á markaðsráðandi stöðu.

Bæta við tveimur flugvélum

Icelandair mun bæta tveimur vélum í flugvélaflota sinn og verða með sextán vélar í rekstri næsta sumar, en vélarnar voru fjórtán síðasta sumar.

Ekki hægt að tala um fólksflótta héðan

Brottflutningur frá Íslandi er síst meiri nú en á öðrum samdráttarskeiðum samkvæmt nýrri skýrslu. Atvinnuleysi á Evrópska efnahagssvæðinu hefur áhrif á að hvorki Íslendingar né útlendingar fari í meiri mæli til annarra landa.

Um helmingur skulda eru bílalán

Skuldir vegna bílalána áttu stóran þátt í að koma heimilum í greiðsluvanda. Ári eftir hrun áttu heimili sem voru í erfiðleikum með að greiða af lánum, rúman helming allra bílaskulda. Velferðarráðherra segir ekki réttlætanlegt að ríkið bjargi fólki úr skuldum vegna bíla og annarrar neyslu.

Rúmlega 40 kannabisplöntur fundust á Selfossi

Töluvert magn kannabisplantna fannst í einbýlishúsi á Selfossi í dag. Lögreglan uppgötvaði plönturnar eftir að fíkniefnahundur hafði runnið á lyktina.

Leggja til að Alþingi þrýsti á bresk stjórnvöld vegna Sellafield

Verði þingsályktunartillaga sem nú liggur fyrir á Alþingi samþykkt mun ríkisstjórnin þrýsta á bresk stjórnvöld og stjórnendur kjarnorkuendurvinnslustöðvarinnar í Sellafield til að minnka umfang hágeislavirks vökva sem geymdur er í stöðinni.

Óttast ekki komu Bauhaus

Átök eru framundan á byggingarvörumarkaði nú þegar Bauhaus hefur boðað komu sína. „Markaðurinn er of lítill nú þegar," sagði Baldur Björnsson hjá Múrbúðinni. Hann var gestur í útvarpsþættinum Reykjavík síðdegis á Bylgjunni í dag.

Hætta á að aukin tæknivæðing leiði til verri aðbúnaðar

Sú hætta er fyrir hendi að aukin tæknivæðing í íslenskri nautgríparækt leiði til versnandi aðbúnað mjólkurkúa. Þetta kemur fram í máli fulltrúa Bændasamtakanna.

Unnu eitt stærsta björgunarafrek Íslandssögunnar

Fimmtán ára drengur og fjölskylda hans unnu eitt stærsta björgunarafrek Íslandssögunnar þegar breskur herflokkur lenti í hrakningum í aftakaveðri á Eskifjarðarheiði. Heimildarmynd um atvikið var frumsýnd á Eskifirði um helgina en það var dagskrárgerðarmaðurinn Þorsteinn J. sem annaðist framleiðslu hennar.

Hundurinn hafði áður drepið

Eigandi læðunnar kærði í gær eiganda hundsins Birnu til lögreglu en þessi sama tík réðist á og drap kött í Dofraborgum í Grafarvogi fyrir um árið. Það atvik var einnig kært til lögreglu en endaði með dómssátt. Í samtali við fréttastofu í dag sagði nágranni, sem varð vitni að þeirri árás, hundana hafa ógnað bæði eiganda kattarins og þeim sem komu honum til hjálpar.

Tekjuhæstu fá mest afskrifað

Sértækar aðgerðir ríkisstjórnarinnar gegn greiðsluvanda komu helst að gagni þeim sem alls ekki voru í slíkum vanda. Þetta er mat hagfræðinga Seðlabankans. Velferðarráðherra tekur fyrir að þetta sé áfellisdómur yfir aðgerðunum.

Útlit fyrir gott ár í ferðaþjónustu

Útlit er fyrir að afar gott ár í ferðaþjónustu, og er áætlað að gjaldeyristekjur geti farið yfir 200 milljarða króna á þessu ári. Átakið Ísland allt árið hefur þegar skilað góðum árangri, segir framkvæmdastjóri Icelandair, en erlendum ferðamönnum hefur fjölgað um 20 prósent það sem af er ári, miðað við árið á undan.

Eldur kom upp í Vesturbergi

Eldur kom upp í íbúðarhúsæði við Vesturberg í Reykjavík fyrir stuttu. Maður og kona voru flutt á slysadeild Landsspítala en grunur leikur á að þau hafi orðið fyrir reykeitrun.

Síminn áfrýjar niðurstöðu Samkeppniseftirlitsins

Síminn mun skjóta málsniðurstöðu Samkeppniseftirlitsins til áfrýjunarnefndar samkeppnismála. Í dag ákvað Samkeppniseftirlitið að leggja 400 milljóna króna sekt á Símann.

Sérstakur saksóknari vann knattspyrnumót lögreglumanna

Lið sérstaks saksóknara bar sigur úr býtum í árlegu landsmóti lögreglumanna í knattspyrnu sem fram fór á Húsavík um helgina. Aðspurður segist Ólafur Þór Hauksson, sérstakur saksóknari, vera stoltur af sínum mönnum.

Um 80% vilja að almenningur geti krafist þjóðaratkvæðagreiðslu

Áttatíuprósent þeirra sem svöruðu Netkönnun Reykjavík síðdegis hér á Vísi vilja að í nýrri stjórnarskrá verði ákvæði um að tiltekið hlutfall kosningabærra manna geti krafist þess að mál fari í þjóðaratkvæðagreiðslu. Einungis 20% atkvæðabærra manna vilja það ekki. Meirihluti stjórnskipunar- og eftirlitsnefndar Alþingis vildi að tilteknar spurningar um stjórnarskrána yrði lagðar í þjóðaratkvæði samhliða forsetakosningum í sumar. Nú er orðið ljóst að ekkert verður úr því en Reykjavík síðdegis ákvað engu að síður að leggja spurningarnar fyrir Vísi. Alls svöruðu 1795 manns spurningunum.

Lögreglan leitar eigenda málverka

Tvö málverk eru í óskilum hjá lögreglunni á höfuðborgarsvæðinu. Eigendurnir geta vitjað þeirra hjá lögreglunni en upplýsingar eru veittar í síma 444-1000 en einnig má senda fyrirspurnir í tölvupósti á netfangið abending@lrh.is. Krafist verður staðfestingar á eignarhaldi.

Fólksflutningar síst meiri nú en áður

Brottflutningur íslenskra ríkisborgara undanfarin ár er síst meiri en hann hefur verið á öðrum samdráttarskeiðum. Þetta fullyrðir Ólöf Garðarsdóttir, prófessor við menntavísindasvið Háskóla Íslands, í nýrri skýrslu um mannfjöldaþróun sem hún vann fyrir velferðarráðuneytið. Í skýrslunni er þetta skýrt með því að atvinnuleysi sé mikið alls staðar á Evrópska efnahagssvæðinu að Noregi undanskildu. Íslendingar hafi líkt og aðrar Norðurlandaþjóðir notið góðs af þeim hagfelldu aðstæðum sem ríki í Noregi og hafi sótt þangað í talsverðum mæli.

Hraunar yfir tillögu meirihlutans: 4 Smáralindir við Landspítalann?

Gísli Marteinn Baldursson, borgarfulltrúi Sjálfstæðisflokksins, gagnrýnir harðlega nýtt deiliskipulag Landspítalans við Hringbraut sem meirihlutinn í borginni hefur lagt fram. Hann segir tillöguna mjög vonda; bílastæðamál séu mjög illa leyst og ásýndin að gamla spítalanum hverfi á bak við risabyggingar.

Segir fylkingar takast á í Hæstarétti

Hæstaréttardómarar túlkuðu skipun Ólafs Barkar Þorvaldssonar og Jóns Steinars Gunnlaugssonar í embætti hæstaréttardómara sem atlögu Davíðs Oddssonar, þáverandi forsætisráðherra, að réttinum. Þeir töldu sér hótað af Davíð í kjölfar öryrkjadómsins svokallaða og óttuðust pólitísk afskipti.

Sólveig Lára gefur kost á sér

Sólveig Lára Guðmundsdóttir, sóknarprestur á Möðruvöllum, hefur ákveðið að gefa kost á sér í embætti vígslubiskups á Hólum. Í tölvupósti til fjölmiðla segist hún leggja áherslu á að vinna að stefnumótun í söfnuðum stiftisins, efla samstarf og hlúa að starfsfólki kirkjunnar. Framundan sé starf við stefnumörkun biskupsembættanna og hún vilji leggja sitt af mörkum til að þau þjóni kirkjunni enn betur. Framboðsfrestur vegna vígslubiskupskjörsins rennur út 30. apríl næstkomandi.