Kom blóðug á lögreglustöð eftir árás frá Facebook-vin

Erlend kona kom á lögreglustöðina við Hverfisgötu um klukkan þrjú í nótt og tilkynnti að á hana hafi verið ráðist á heimili hennar í Vesturborginni. Konan, sem var nokkuð blóðug, sagðist hafa kynnst manni á Facebook og hann komið heim til hennar. Eftir stuttar samræður hafi maðurinn ráðist á hana. Hann hafi síðan stolið farsíma hennar. Þetta kemur fram í dagbókarfærslu lögreglunnar en ekki er vitað á þessari stundu um líðan konunnar.

Mikil aukning ferðamanna í Leifsstöð

Alls fóru 33.600 erlendir ferðamenn frá landinu í nýliðnum marsmánuði eða tæplega sjö þúsund fleiri en í sama mánuði árið 2011 og nemur aukningin 26,2 prósentum á milli ára. Þetta er vel yfir meðallagi en á þeim ellefu árum sem Ferðamálastofa hefur talið ferðamenn í Leifsstöð hefur aukningin að jafnaði verið tæp átta prósent. Ferðamenn í nýliðnum mars voru tæplega helmingi fleiri en í sama mánuði árið 2002.

Íslendingum fjölgaði um 1.123 einstaklinga í fyrra

Hinn 1. janúar síðastliðinn voru íbúar landsins 319.575. Þeim fjölgaði um 0,4% frá sama tíma árið áður eða um 1.123 einstaklinga.

Stundvísin stórbatnar í Keflavík

Stundvísi íslenskra félaga á Keflavíkurflugvelli hefur stórbatnað að því er fram kemur í tölum á vefsíðunni Túristi.is. Þar segir að síðasta sumar hafi Keflavíkurflugvöllur ekki staðist samanburð við stærstu flugvelli Norðurlanda þegar kemur að stundvísi en þá fóru um 90 allra véla í höfuðborgum hinna Norðurlandanna í loftið á réttum tíma á meðan hlutfallið í Keflavík fór niður í 45 prósent á tímabili.

Fáir skemmtistaðir með kranabjór frá fleiri en einum söluaðila

Tvö örbrugghús hafa sakað Vífilfell og Ölgerðina um að einoka markaðinn fyrir kranabjór og leitaði einn til Samkeppniseftirlitsins síðastliðinn föstudag. Samkvæmt heimildum fréttastofu gerði bjórframleiðandi sem nú hefur lagt upp laupana slíkt hið sama fyrir nokkru en sá segist hafa reynt að koma bjórtegund sinni á dælu í um ár án árangurs þrátt fyrir góða sölu á bjórnum í vínbúðum.

Hundur í óskilum hjá 365

Þessi vinalegi voffi hefur gert sig heimankominn á skrifstofum 365 en þangað kom hann óboðinn og eigandalaus. Hann er ómerktur en þeir sem kannast við hvutta geta haft samband í síma 899 9747.

Þörungar geta leyst af innflutt eldsneyti

Lífeldsneyti má framleiða úr þörungum í slíku magni að komi í staðinn fyrir innflutt eldsneyti. Orkusparandi ljósdíóðutækni og aðgangur að jarðhita gera aðstæður hér til framleiðslunnar einstakar. Hægt væri að flytja út lífeldsneyti.

Íslendingar ekki lengur í hópi hamingjusömustu þjóðanna

Íslendingar eru ekki lengur meðal hamingjusömustu þjóða heimsins að því er fram kemur í nýrri skýrslu í Bandaríkjunum um málið.

Starfsfólkið fær líka spítalamat

Framkvæmdastjórn Landspítala hefur ákveðið að eldhús spítalans taki við rekstri matsala fyrir starfsfólk þann 1. maí 2012. Frá þessu er greint á vef Landspítalans, lsh.is.

Vinabeiðni aðmíráls reyndist fölsk

Yfirmenn í herafla Bandaríkjanna og Bretlands, auk háttsettra embættismanna í löndunum tveimur, féllu í gildru njósnara þegar þeir samþykktu vinabeiðni á Facebook-samskiptasíðunni sem virtist vera frá James Stavridis, bandarískum aðmírál sem starfar nú sem yfirmaður herafla NATO í Evrópu.

Dópaður á krossara - fær tíu kærur á sig

Lögreglan á Selfossi veitti manni í bænum eftirför í gær eftir að hann hafði ekki sinnt fyrirmælum um að stöðva farartæki sitt. Maðurinn var á númerslausu torfæru hjóli og endaði eftirförin á skógræktarsvæðinu í Hellismýri, fyrir utan bæinn. Þar hafði hann fest hjólið í drullu utanvegar og gat sig hvergi hrært.

Netvarnir hjá NATO efldar fyrir milljarða

Atlantshafsbandalagið ætlar að verja nærri tíu milljörðum króna í að efla netvarnir bandalagsins. Ætla að koma upp viðbragðsteymum sem aðildarríki geta kallað til sé gerð netárás. Fölsk vinabeiðni aðmíráls kom bandalaginu í bobba.

Heimaljósastúdíó fyrir fyrsta sætið

Ljósmyndasamkeppni Fréttablaðsins lýkur á hádegi í dag en þemað er „Páskastemning“. Besta myndin mun prýða forsíðu Fréttablaðsins á laugardaginn kemur.

Gæsluvarðhald til loka mánaðar

Dómsmál Gæsluvarðhald yfir Annþóri Kristjáni Karlssyni og Berki Birgissyni var fyrir helgi framlengt til 27. apríl.

Hefur ekki áhrif á önnur bönn

Ákvörðun ÁTVR um að heimila sölu á bjór kenndum við svarta dauða mun ekki hafa áhrif á tilvik þar sem fyrirtækið hefur hafnað öðrum tegundum áfengis. Þetta segir Sigrún Ósk Sigurðardóttir, aðstoðarforstjóri Áfengis- og tóbaksverslunar ríkisins (ÁTVR).

Háskólunum verði fækkað úr sjö í fjóra

Fjárveitingar til háskóla eru mun minni hér en annars staðar. Veikleikar háskólastigsins felast í of mörgum og fámennum skólum. Hægt væri að fækka skólunum án mikillar röskunar, eða breyta rekstrarformi til að auka samstarf.

Besta páskaveðrið fyrir austan

„Það verður suðvestan- og vestanátt ríkjandi næstu daga. Á norðan- og austanverðu landinu verður hins vegar norðvestan- og norðanátt hluta úr degi á laugardeginum. Þá verður snjókoma eða él,“ segir Óli Þór Árnason, veðurfræðingur á Veðurstofu Íslands, spurður um páskaveðrið.

Annar höfuðpaurinn játaði sök

Annar höfuðpauranna í stórfelldu og flóknu fjársvikamáli sem beindist að tveimur eignarhaldsfélögum og Íbúðalánasjóði játaði sök við þingfestingu þess í gær. Hinn tók sér frest til að taka afstöðu til ákærunnar.

Jón Gnarr: "Við erum frumkvöðlar"

"Borgarstjórar víða um heim horfa til okkar því við erum frumkvöðlar,“ segir Jón Gnarr. Hann vill færa valdið til fólksins og leyfa því að ráða hvernig peningum borgarinnar er ráðstafað.

Fylgi ríkisstjórnar minnkar - Sjálfstæðisflokkur eykur við sig

Fylgi Sjálfstæðisflokksins eykst töluvert milli febrúar og mars samkvæmt þjóðarpúlsi Gallup. Þá segja 26% að þau styðji ríkisstjórnina - aðeins einu sinni hefur sitjandi ríkisstjórn mælst með minni stuðning en það var í upphafi árs 2009. Greint var frá þessu í kvöldfréttum RÚV.

"Allir hundar eru rándýr"

"Allir hundar eru rándýr. Það er í eðli þeirra að veiða en eigandinn á að stjórna hundinum,“ sagði Ásta Dóra Ingadóttir, hundaþjálfari hjá Gallerý Voff. Hún var gestur í útvarpsþættinum Reykjavík síðdegis á Bylgjunni í dag.

Fordómar miklir segir transmaður

Karlmanni sem fæddist í líkama konu var misþyrmt af þremur karlmönnum á skemmtistað um helgina. Transmaður segir fólk í þeirra stöðu hrætt.

Segir "gamaldags" vinnubrögð vera við lýði á Alþingi

„Þeir einstaklingar sem eru á þingi í dag eru stjórnmálamenn gamla tímans," sagði Sigurbjörg Sigurgeirsdóttir stjórnsýslufræðingur en hún var gestur í útvarpsþættinum Reykjavík Síðdegis á Bylgjunni í dag.

Segir útkomu Drekaútboðsins framar björtustu vonum

Þrjár umsóknir bárust um sérleyfi til rannsókna og olíuvinnslu á Drekasvæðinu. Íslendingar eru aðilar að þeim öllum og reynd bresk leitarfélög standa að tveimur umsóknanna. Orkumálastjóri segir útkomuna framar björtustu vonum.

Kvartað undan lausagöngu Husky-hunda í Grafarvogi

Kvartað hefur verið undan lausagöngu Siberian Husky-hunda í Grafarvogi að undanförnu en tveir slíkir léku þar lausum hala í gær og drap annar þeirra kött. Eigandinn, sem hefur sex Husky-hunda í sinni umsjá, var kærður í morgun.

Talið að lík skipstjóra Hallgríms hafi fundist við Noregsstrendur

Lík sem fannst í sjónum fyrir utan Noregsstrendur á fimmtudaginn er talið vera af skipstjóra Hallgríms, sem fórst í sjóslysi í janúar síðastliðnum.

Tólf mánaða fangelsi fyrir þaulskipulagða glæpi

Tveir menn hafa verið dæmdir í tólf mánaða fangelsi fyrir að setja afritunarbúnað á hraðbanka Arion banka að Laugavegi 120 í Reykjavík og í hraðbanka Landsbanka í Austurstræti 14 í Reykjavík og afrita upplýsingar. Annar mannanna játaði brot sitt en sagði að ekki hefði tekist að afrita upplýsingarnar. Hinn maðurinn neitaði sök.

Fær 108 milljónir skattfrjálst - þurfti að fara oft yfir vinningsmiðann

Hinn heppni eigandi Víkingalottómiða sem var með allar tölurnar réttar í síðasta útdrætti í Víkingalottóinu hefur gefið sig fram við Íslenska getspá. Hann er nú tæplega 108 milljónum krónum ríkari.

Eykon sækir um Drekann

Þriðja umsóknin er komin í Drekasvæðið, frá Eykon Energy, norsku félagi í eigu Íslendinga og Norðmanna. Heiðar Már Guðjónsson hagfræðingur og fjárfestir, sem er stjórnarformaður Eykon Energy, staðfestir í samtali við fréttastofuna að félagið hafi lagt inn tilboð um tvöleytið í dag.

Vilja stjórnarskrárbundna vernd transfólks

Nauðsynlegt er að bæta inn í stjórnarskrá og refsilöggjöfina ákvæði til verndar transfólki með kynvitund sem ekki samræmist þeirra líffræðilega kyni. Þetta segir í yfirlýsingu frá Samtökunum ´78 í tilefni af því að ráðist var á transmann í Reykjavík um helgina. Í yfirlýsingunni kalla Samtökin ´78 eftir umburðarlyndi og skilningi fólks á milli. Þjóðfélagið væri miklu minna virði ef allir væri steyptir í sama mót.

Lögreglan lýsir eftir grárri Boru

Lögreglan á höfuðborgarsvæðinu lýsir eftir ljósgráum Volkswagen Bora með skráningarnúmerið UU-837 en bílnum var stolið frá Grjótaseli í Reykjavík um þar síðustu helgi. Þeir sem geta gefið upplýsingar um hvar bíllinn er niðurkominn eru vinsamlegast beðnir um að hafa samband við lögregluna í síma 444-1000 eða senda tölvupóst á netfangið abending@lrh.is.

Farþegarnir slógust eftir bílveltu

Lögreglan á Ísafirði handtók á föstudagskvöld ökumann bifreiðar sem lenti á ljósastaur og valt á veginum til móts við Strandgötu í Hnífsdal. Hann er grunaður um bæði ölvunar- og fíkniefnaakstur. Á vestfirska fréttamiðlnum Bæjarins Besta segir að í bílnum hafi verið fjórir karlmenn sem hafi allir sloppið með minniháttar áverka eftir veltuna. En þegar lögreglumenn komu á vettvangi höfðu brotist út slagsmál meðal mannanna en þá voru aðrir vegfarendur og sjúkraflutningamenn komnir á vettvang. Tekið var blóðsýni úr ökumanninum en aðstæður á vettvangi báru þess merki að ekið hafi verið mjög ógætilega.

Minnihlutinn krefst skýringa á málum leikskólakennara

Sjálfstæðismenn og VG í borgarstjórn hafa óskað eftir sérstakri umræðu í borgarstjórn á morgun um málefni leikskólakennara.

Ákærðir fyrir tugmilljóna svindl

Fjórir karlmenn hafa verið ákærðir fyrir að svíkja samtals um tugi milljóna króna út úr Íbúðalánasjóði sumarið 2009. Málið var þingfest í Héraðsdómi Reykjaness fyrir hádegi í dag. Í öðru tilfellinu var brotið framið þann 8. júní 2009 en í hinu tilfellinu 2. júlí sama ár. Mennirnir eru líka ákærðir fyrir að svíkja fé af einstaklingum og fyrirtækjum. Mennirnir eru ungir að árum, en sá elsti er 25 ára og sá yngsti einungis 21. árs.

Ánægja með aðgengi að heilbrigðisþjónustu

Langflestir foreldrar, eða um 77%, eru annaðhvort frekar eða mjög ánægðir með aðgengi barna sinna að heilbrigðisþjónustu. Þetta kemur fram í niðurstöðum rannsóknar sem unnar voru á vegum Lýðheilsustöðvar, sem nú er hluti af Landlækni. Í könnuninni voru foreldrar barnanna spurðir að því hversu ánægðir þeir eru með aðgengi að heilbrigðisþjónustunni.

Með þýfi, amfetamín og kannabis í bílnum

Lögreglumenn á Selfossi höfðu afskipti af ökumanni á leið um Suðurlandsveg í Ölfusi um níuleytið í morgun. Í ljós kom að í bifreiðinni voru tveir karlar og ein kona og var ökumaðurinn undir sýnilegum áhrifum fíkniefna. Við leit í bifreiðinni fundust fíkniefni, amfetamín og gras. Auk þess var heilmikið af tóbaki, gosdrykkjum og fleiru smálegu. Við nánari skoðun kom í ljós að um var að ræða þýfi úr Kertasmiðjunni í Brautarholti á Skeiðum en þar var brotist inn í nótt. Fólkið var handtekið og fært í fangageymslu. Ökumaðurinn hefur viðurkennt innbrotið og er málið upplýst. Til viðbótar þessu var ökumaðurinn sviptur ökurétti.

Sviptu mann frelsi sínu og beittu á hann rafstuðbyssu

Um klukkan átta í gærkvöldi var sjúkrabíll sendur á Þorlákshöfn vegna manns sem talið var að hefði orðið fyrir rafstuði. Þegar lögreglan kom á staðinn kom í ljós að óþekktir einstaklingar höfðu ráðist að ungum karlmanni og svipt hann frelsi sínu um stundarsakir og meðal annars beitt á hann rafstuðbyssu. Ástæðan var talin vera sú að árásarmennirnir höfðu manninn grunaðan um innbrot og þjófnaði í húsnæði þeim tengdum. Ungi maðurinn var fluttur á heilsugæslustöðina á Selfossi til skoðunar en áverkar hans reyndust ekki alvarlega. Lögreglan á Selfossi fer með rannsókn málsins.

OLÍS og Verkís sækja um Drekasvæðið með erlendu félagi

Olíuverslun Íslands og Verkfræðistofan Verkís eru meðal eigenda nýstofnaðs íslensk olíuleitarfélags sem í samstarfi við erlent olíuleitarfélag sendi inn umsókn í Drekasvæðið í morgun. Þar með er ljóst að minnst tvær umsóknir berast áður en frestur rennur út klukkan fjögur í dag.

Ólafur Arnarson segir stefnuna bjánalega

Ólafur Arnarson segir meiðyrðastefnu Friðriks J. Arngrímssonar, framkvæmdastjóra LÍÚ, á hendur sér bjánalega. Hann treystir því að dómstólar láti ekki frekju og fantaskap verða til þess að venjulegt fólk, eins og hann, verði fyrir stóru fjárhagstjóni.

Hundaeigandinn kærður til lögreglu

Eigandi tveggja hunda af Husky kyni sem drápu kött í foldahverfinu í Grafarvogi í gær hefur verið kærður til lögreglu. Árásin var svo grimmileg að dýrið hryggbrotnaði.

Tugir leikskólakennara mótmæla

Tugir leikskólakennara eru samankomnir fyrir framan Ráðhús Reykjavíkur til að mótmæla ákvörðun borgaryfirvalda um að fella niður greiðslur fyrir neysluhlé. Formaður Félags leikskólakennara staðfesti í gær að félagið ætlaði í mál við borgina. Þegar er hafinn undirbúningur að stefnunni en málið verður rekið fyrir Héraðsdómi Reykjavíkur.

Insúlíndælu stolið

Kona á þrítugsaldri varð fyrir því óláni að töskunni hennar var stolið á skemmtistaðnum Faktorý aðfaranótt laugardags. Í henni voru bæði sími og greiðslukort og tjónið því bagalegt. Verst af öllu er þó að í töskunni var jafnframt insúlíndæla sem konan þarf sárlega á að halda. Lögreglan skorar á þjófinn að skila insúlíndælunni enda afar hæpið að hún komi honum að einhverju gagni. Konan sem á dæluna getur alls ekki án hennar verið yrði hins vegar mjög þakklát ef insúlíndælunni yrði skilað. Upplýsingum um málið má koma á framfæri í síma 444-1000 eða í tölvupósti á netfangið abending@lrh.is.

Tvíhliða myntsamstarf við Kanada var rætt á fundi Steingríms í Ottawa

Steingrímur J. Sigfússon, efnahags- og viðskiptaráðherra, segir að tvíhliða myntsamstarf við Kanada hafi komið til umræðu á fundi sem hann átti með fulltrúum Seðlabanka Kanada í Ottawa í síðustu viku. Sjá viðtal við Steingrím hér.

Dorrit horfir á Sólskinsdreng í húsakynnum Sameinuðu þjóðanna

Dorrit Mousieff forsetafrú verður viðstödd sérstaka sýningu á myndinni Sólskinsdrengur í húsakynnum Allsherjarþings Sameinuðu þjóðanna í New York á alþjóðlegum degi einhverfu, sem er í dag.

Í gæsluvarðhald eftir árás á konu með kertastjaka

Karlmaður á þrítugsaldri var úrskurðaður í gæsluvarðhald fram á miðvikudag í gær vegna alvarlegrar líkamsárásar á konu í heimahúsi í Kópavogi aðfaranótt sunnudags. Samkvæmt upplýsingum frá lögreglu var maðurinn handtekinn á staðnum en hann er talinn hafa slegið konuna í höfuðið með kertastjaka. Hún var flutt á slysadeild eftir árásina en er ekki í lífshættu. Maðurinn er ekki búsettur á heimilinu en þekkir konuna. Hann hefur ekki komið við sögu hjá lögreglu áður. Málið er í rannsókn.