Grásleppuveiðimenn kærðir til lögreglu

Fiskistofa hefur kært nokkra grásleppuveiðimenn til lögreglu fyrir að hafa of mörg grásleppunet í sjó.

Verkefnið hefur verið unnið í samstarfi við Landhelgisgæsluna en farið var um borð í grásleppubáta á Norðurlandi á dögunum eftir að skoðun á gögnum og veiðarfærum á veiðislóð gáfu vísbendingar um að netafjöldi væri umfram leyfilegan fjölda.

Eftirlitsmenn voru viðstaddir þegar öll netin voru dregin og leiddi talning í ljós að fjöldi neta var langt umfram það sem heimilt er.

Fiskistofa og Landhelgisgæslan munu halda þessu samstarfi áfram með það að markmiði að reglum um hrognkelsaveiðar sé framfylgt.