Leggja til að Alþingi þrýsti á bresk stjórnvöld vegna Sellafield

Verði þingsályktunartillaga sem nú liggur fyrir á Alþingi samþykkt mun ríkisstjórnin þrýsta á bresk stjórnvöld og stjórnendur kjarnorkuendurvinnslustöðvarinnar í Sellafield að minnka umfang hágeislavirks vökva sem geymdur er í stöðinni.

Flutningsmenn tillögunar eru þau Álfheiður Ingadóttir, Birgitta Jónsdóttir og Margrét Tryggvadóttir.

Álfheiður segir að það sé í raun tvennt sem liggi til grundvallar ályktuninni. „Annars vegar hefur Geislavarnastofnun Noregs komist að þeirri niðurstöðu að ef eins 1% af þessum hágeislavirka vökva sem geymdur er í Sellafield sleppur út í andrúmsloftið gæti það leitt til sjö sinnum meira geislavirks úrfellis í Noregi en Tsjernóbyl-slysið olli," segir Álfheiður.

„Hins vegar lofuðu stjórnendur í Sellafield og bresk stjórnvöld árið 2009 að fara að tappa niður það magn hágeislavirks úrgangs sem geymdur er í stöðinni," segir Álfheiður. „Þetta eru núna um 1.000 tonn af úrgangi sem geymd eru í Sellafield. Áætlað var að 200 tonn af úrgangi yrði í stöðinni árið 2016 - það er þó ekkert sem bendir til þess að þeir ætli að standa við það loforð."

Álfheiður segir að lítil umræða hafi verið hér á landi um geislavirkan úrgang. Þá er þingsályktunartillagan liður í því að vekja athygli á þessum málum.

Hægt er að nálgast ályktunina hér.