Ríkisstjórnin minnir á aðild Íslands að EES

Forsætisráðuneytið hefur sent frá sér tilkynningu þar sem minnt er á að Ísland er aðili að Evrópska efnahagssvæðinu. Í Silfri Egils í gær var talað við Evu Joly og Alain Lipietz, fulltrúa Græningja á Evrópuþinginu. Í máli þeirra komu fram miklar efasemdir um að Íslendingar, eða íslenski innstæðutryggingasjóðurinn, ættu að bera ábyrgð á innstæðum á Icesave reikningum Breta og Hollendinga. Að mati þeirra eiga viðkomandi lönd að bera ábyrgðina vegna þess að Ísland er utan Evrópubandalagsins.

Líf sækist eftir öðru sætinu hjá VG

Líf Magneudóttir gefur kost á sér í forval Vinstri grænna til borgarstjórnarkosninganna í vor og sækist hún eftir 2. sæti á lista. Í tilkynningu frá Líf segir að hún hafi verið flokksbundin frá árinu 2004 og stutt flokkinn frá upphafi.

Ræddi við Reinfelt og Stoltenberg

Jóhanna Sigurðardóttir, forsætisráðherra, hefur í dag rætt við Fredrik Reinfeldt, forsætisráðherra Svíþjóðar, Matti Vanhanen, forsætisráðherra Finnlands, og Jens Stoltenberg, forsætisráðherra Noregs, um stöðu mála hér á landi í kjölfar synjunar forseta Íslands á Icesave lögunum.

Dómari féllst á lokað þinghald í mansalsmálinu

Mansalsmálið svokallaða var tekið fyrir í Héraðsdómi Reykjaness í dag en fimm Litháar og einn íslenskur karlmaður eru ákærðir í málinu. Réttargæslumaður litháískrar stúlku sem talið er að átt hafi að þvinga í vændi hér á landi krafðist þess við upphaf þingfestingarinnar að þinghaldið yrði lokað og féllst dómarinn á það.

Stjórnarandstaðan boðuð í forsætisráðuneytið

Jóhanna Sigurðardóttir, forsætisráðherra, hefur boðað formenn stjórnarandstöðuflokkanna á Alþingi til fundar við sig í forsætisráðuneytinu klukkan fjögur. Steingrímur J. Sigfússon, fjármálaráðherra, mun einnig sitja fundinn.

Þjófnaðurinn í sendiráðinu í Vín enn til rannsóknar

Efnahagsbrotadeild Ríkislögreglustjóra hefur enn til rannsóknar mál konu sem gegndi starfi bókara í sendiráði Íslands í Vín og grunuð er um að hafa dregið sér rúmlega 50 milljónir króna. Helgi Magnús Gunnarsson yfirmaður deildarinnar á von á því að niðurstaða liggi fyrir eftir nokkrar vikur og þá verði tekin ákvörðun hvort að konan verði ákærð.

Nýbygging HR í Nauthólsvík tekin í notkun

Nýbygging Háskólans í Reykjavík í Nauthólsvík var formlega tekin í notkun í morgun. Um eitt þúsund nemendur gengu af því tilefni fylktu liði frá aðalbyggingu skólans við Ofanleiti að nýju skólabyggingunni.

VG eini flokkurinn sem hefur skilað ársreikningi

Vinstrihreyfingin grænt framboð er eini starfandi stjórnmálaflokkurinn sem hefur skilað inn ársreikning fyrir árið 2008 til Ríkisendurskoðunar. Lárus Ögmundsson, skrifstofustjóri hjá stofnuninni, veit ekki til þess að von sé á gögnum frá öðrum flokkum.

Sex árekstrar í borginni það sem af er degi

Nokkuð hefur verið um árekstra í dag vítt og breytt um höfuðborgarsvæðið sem rekja má til lúmskrar hálku sem verið hefur á götum borgarinnar. Að sögn lögreglu hafa sex árekstrar orðið það sem af er degi. Harkalegasti áreksturinnvarð á gatnamótum Stórholts og Þverholts en þar þurfti að flytja ökumenn á slysadeild. Meiðsli þeirra munu þó hafa verið minniháttar.

Fréttastjóri á Mogganum blandar sér í oddvitaslag

Hlynur Sigurðsson, fréttastjóri MBL Sjónvarps, blandar sér í oddvitaslag sjálfstæðismanna í Hafnarfirði á Facebook. Þar er Hlynur einn af rúmlega 200 stuðningsmönnum Valdimars Svavarssonar, hagfræðings, sem gefur kost á sér í 1. sæti í prófkjöri flokksins í bæjarfélaginu vegna komandi bæjarstjórnarkosninga. Auk Valdimars gefur Rósa Guðbjartsdóttir, bæjarfulltrúi, kost á sér í fyrsta sætið.

Gjöld vegna komu barna á slysadeild afnumin

Gjöld vegna komu barna á slysadeild og bráðamóttöku sjúkrahús hafa verið afnumin með nýrri reglugerð sem heilbrigðisráðherra gaf út og tók gildi um áramótin.

Innstæður ekki tryggðar fyrr en eftir hrun

Ríkisstjórn Geirs Haarde gaf aldrei út yfirlýsingu sumarið 2008 um að allar innstæður væru tryggðar, eftir því sem næst verður komist. Þær yfirlýsingar voru gefnar eftir bankahrun. Hins vegar lýsti viðskiptaráðuneytið því yfir í bréfasamskiptum við bresk stjórnvöld sumarið 2008 að stutt yrði við bakið á tryggingarsjóði innstæðueigenda til að hann gæti staðið við skuldbindingar sínar.

ESB gæti verið skaðabótaskylt í Icesave málinu

Evrópusambandið gæti verið skaðabótaskylt vegna gallaðrar tilskipunar um innistæðutryggingar að mati Stefáns Más Stefánsson, lagaprófessors. Hann segir að tilskipunin gæti hafa skapað réttmætar væntingar fyrir innistæðueigendur í Bretlandi um að innistæður þeirra væru tryggðar upp að 20 þúsund evrum, en svo sé ekki raunin.

Neytendasamtökunum bárust rúmlega 11 þúsund erindi

Neytendasamtökunum bárust í fyrra rúmlega 11 þúsund erindi. Meirihlutinn kom frá einstaklingum en einnig var töluvert um erindi frá fyrirtækjum. Flestar fyrirspurnirnar vörðuðu fjármála- og innheimtufyrirtæki, raftæki, bifreiðar og fjarskiptafyrirtæki, en töluverð aukning var í fjölda fyrirspurna í fyrstnefndu flokkunum. Þetta kemur í ársskýrslu Leiðbeininga- og kvörtunarþjónustu Neytendasamtakanna fyrir árið 2009.

Víða hálka

Hálkublettir eru á kafla austan við Selfoss. Eins eru nú hálkublettir á höfuðborgarsvæðinu, á Kjalarnesi, Reykjanesbraut og Grindavíkurvegi, að fram kemur í tilkynningu í Vegagerðinni.

Skotið úr riffli á sumarbústað

Lögreglan á Selfossi rannsakar nú að skotið var á sumarbústað í landi Nesja. Þremur riffilskotum hefur verið skotið þar í gegnum glugga, en fólk var síðast í bústaðnum fyrir tveimur mánuðum. Engar vísbendingar eru um hver var þar að verki og eiganda bústaðarins hafa ekki borist neinar hótanir.

22 frambjóðendur í prófkjöri Samfylkingarinnar í Hafnarfirði

Framboðsfrestur vegna prófkjörs Samfylkingarinnar í Hafnarfirði sem haldið verður dagana 28. til 30. janúar rann út í gær. Alls gefa 22 kost a sér, tíu konur og tólf karlar. Elsti frambjóðandinn er á 64 aldursári en sá yngsti á því nítjánda. Gunnar Svavarsson, fyrrverandi þingmaður og fyrrverandi forseti bæjarstjórnar, gefur ekki kost á sér.

Kreppan hefur ekki áhrif á geðheilsu barna

Enn sem komið er hefur ekki orðið marktæk aukning í eftirspurn eftir geðheilbrigðisþjónustu fyrir börn og unglinga hér á landi eftir bankahrunið. Ólafur Ó. Guðmundsson, yfirlæknir barna- og unglingageðlækninga á BUGL, segir þó of snemmt að fagna. Erlendar rannsóknir bendi til þess að efnahagskreppa hafi neikvæð áhrif á geðheilsu barna og unglinga. BUGL stendur fyrir ráðstefnu næstkomandi föstudag um málefni sem tengjast geðheilbrigði barna og unglinga.

Vill uppbyggðan veg í Lakagíga

Perlur Vatnajökulsþjóðgarðs eiga ekki bara að vera fyrir ríka jeppakarla. Byggja verður upp hálendisvegi svo þjóðgarðurinn verði aðgengilegur öllum, líka fólki í hjólastólum. Þetta segir hótelstjóri í Vestur-Skaftafellssýslu

Vill að Hanna Birna víki

Ólafur F. Magnússon, borgarfulltrúi, vill að Hanna Birna Kristjánsdóttir víki sem borgarstjóri. Þetta er í annað sinn á skömmum tíma sem Ólafar kallar eftir afsögn Hönnu Birnu. „Borgarstjóri sem er taglhnýtingur spilltasta auðvalds á Íslandi verður að víkja. Það eru almannahagsmunir,“ segir Ólafur í tilkynningu.

Róleg helgi hjá löggunni

Óvenju lítið var að gera hjá lögreglunni á höfuðborgarsvæðinu um helgina. Að sögn varðstjóra voru mun færri útköll en um venjulega helgi, og hvergi kom til stór vandræða.

Flýja skattbreytingar með stofnun samlagsfélaga

„Biðröðin hjá okkur var löng milli jóla og nýárs,“ segir Bergþóra Sigmundsdóttir, deildarstjóri hjá Sýslumanninum í Reykjavík. 41 nýtt samlags- og sameignarfélag var skráð þar þá tvo virku daga sem opið var á síðustu dögum nýliðins árs. Til samanburðar voru 63 ný félög skráð allt árið í Reykjavík í hittifyrra. Verið er að vinna í því að taka saman heildartölur um skráningu ársins í höfuðborginni.

Almenn ánægja með störf forseta Íslands

Tæplega tveir af hverjum þremur sem afstöðu tóku í skoðanakönnun Fréttablaðsins telja að Ólafur Ragnar Grímsson hafi staðið sig vel í embætti forseta Íslands.

Hafa ekkert rætt um aðkomu sáttasemjara

Íslensk stjórnvöld hafa ekki ámálgað þá hugmynd við Breta og Hollendinga að fá erlendan sáttasemjara til að miðla málum í Icesave-deilunni. „Það er nú ekki hægt að segja að þessi samskipti hafi komist neitt á það stig,“ segir Steingrímur J. Sigfússon.

Segir Lipietz misskilja málið

Svo virðist sem ekki standi steinn yfir steini í málflutningi franska Evrópuþingmannsins Alains Lipietz, sem tjáði sig um Icesave-málið í Silfri Egils í gær. Þetta segir Björn Valur Gíslason, þingmaður Vinstri grænna, sem segir þann franska fara með rangt mál varðandi þrjú grundvallar­atriði. Fyrir það fyrsta hafi Lipietz ekki samið tilskipunina um evrópska innstæðutryggingakerfið, eins og haldið hefur verið fram í fjölda fjölmiðla, enda hafi hann ekki tekið sæti á Evrópuþinginu fyrr en fimm árum eftir að sú tilskipun tók gildi.

Umferð eykst eftir samdrátt

Umferðin á sextán völdum talningarstöðum á hringveginum var 2,2 prósentum meiri á árinu 2009 en árinu 2008. Umferðin var hins vegar minni en hún var metárið 2007 þótt ekki muni miklu.

HR flyst í nýja húsið í dag

Háskólinn í Reykjavík (HR) flytur í nýja byggingu í Nauthólsvík í dag. Til að fagna tilefninu ætla nemendur og kennarar skólans að ganga fylktu liði frá aðalbyggingu skólans í Ofanleiti að nýju byggingunni.

Mikið líf þrátt fyrir klórleka

Nýr fiskteljari í Varmá við Hveragerði hefur gefið áhugaverðar niðurstöður um lífríki árinnar. Teljarinn var settur niður vegna klórleka í ána fyrir tveimur árum og er samstarfsverkefni Veiðimálastofnunar, Veiðifélags Varmár og Þorleifslækjar og Stangaveiðifélags Reykjavíkur.

Mokuðu snjó af fótboltavelli

Nokkrir drengir á Stöðvarfirði láta snjóþyngsli ekki stöðva fótboltaiðkun sína. Þeir eyddu stærstum hluta helgarinnar í að moka burt snjóinn á gervigras­sparkvelli í bænum.

Flekamönnum sleppt úr haldi

Héraðsdómur hafnaði um helgina beiðni lögreglu um gæsluvarðhald yfir tveimur mönnum sem reyndu að flýja land með því að lauma sér um borð í skipið Reykjafoss með aðstoð heimagerðs fleka.

Fær 125 milljónir í styrk

Rannsóknarstöð Hjartaverndar hefur nýverið fengið rannsóknastyrki frá Bandarísku heilbrigðisstofnuninni (NIH) til rannsókna á sambandi æðakerfis og heila- og nýrnastarfsemi sem og til rannsókna á notkun beinamynda sem munu spá fyrir um líkur á beinbrotum. Styrkirnir nema 125 milljónum króna.

Ofanvatn sagt ógna vatnasviði

Nýr þjónustusamningur milli Siglingastofnunar Íslands og Neyðarlínunnar um rekstur Vaktstöðvar siglinga var undirritaður í gær. Eldri samningur hefur verið í gildi frá árinu 2004. Hlutverk aðila skiptast þannig að Siglingastofnun hefur með höndum fjárhagslegt og faglegt eftirlit með rekstrinum, sinnir samskiptum við stjórnvöld og samstarfi við alþjóðastofnanir um siglingamál. Neyðarlínan sér um fjármál og rekstur vaktstöðvarinnar og gerir samninga við verktaka þar um.

Tvö skip voru kyrrsett í fyrra

Siglingastofnun Íslands kyrrsetti tvö skip og gerði athugasemdir við ástand níutíu til viðbótar við hafnarríkiseftirlit árið 2009.

Norðurlöndin undirbúa svar

Steingrímur fundaði fyrir helgi með kollegum sínum á Norðurlöndum um það hvaða áhrif tafirnar í Icesave-málinu hafa á fyrirgreiðslu þaðan.

Ekki greitt fyrir utanlandsferð stjórnarmanns síðan 2004

Stjórnarmenn Landsvirkjunar hafa ekki farið til útlanda á kostnað fyrirtækisins síðustu fimm ár, að sögn Þorsteins Hilmarssonar, upplýsingafulltrúa Landsvirkjunar.

Ekki aðeins útvaldir fái afslátt

„Lögfræðingur okkar segir að þetta hafi verið á gráu svæði svo við ætlum að breyta afsláttarfyrirkomulaginu," segir Pétur Ágústsson, framkvæmdastjóri Sæferða, sem rekur Breiðafjarðarferjuna Baldur.

Íslensk hornsíli bæta skilning á þróun lífs

Hornsíli í Vífilsstaðavatni gegna þýðingarmiklu hlutverki í nýrri rannsókn sem bendir til þess að þróun lífs á jörðinni verði frekar í stórum stökkum en í hægari skrefum. Um þetta hafa líffræðingar deilt síðan á tímum Darwins, segir Bjarni Jónsson, sviðstjóri þróunar- og nýsköpunarsviðs Veiðimálastofnunar (VMST), sem vann að rannsókninni.

Skólastarf óbreytt enn um sinn

Skólastarf heldur áfram óbreytt í grunnskóla Borgarfjarðar að Kleppjárnsreykjum enda hafi ekki verið tekin ákvörðun um annað, að sögn Páls S. Brynjarssonar, sveitarstjóra í Borgarbyggð.

Bakteríur ónæmar fyrir sótthreinsiefni

Örverur geta orðið ónæmar fyrir sótthreinsandi efnum sem áttu að drepa þær, samkvæmt nýjustu rannsóknum. Þá hafa breyttu bakteríurnar meira þol við algengu breiðvirku sýklalyfi.

Allt gengur hægar en vanalega

„Ég get lítið sagt um ástandið í öðrum hlutum landsins, en hérna í Berlín tek ég fyrst og fremst eftir því að allt virðist ganga eðlilega fyrir sig en mun hægar en vanalega,“ segir Hafdís Erla Hafsteinsdóttir, sem nemur sagnfræði í lýðháskóla í Berlín.

Sigmundur Davíð: Núverandi samningar eru ekki viðunandi

Núverandi samningur um Icesave er ekki viðunandi þótt ríkisstjórnin hafi haldið öðru fram, vegna þvingana af hálfu Alþjóðagjaldeyrissjóðsins og Norðurlandanna. Þetta segir formaður Framsóknarflokksins.

Köstuðu tómatsósu og sinnepi á sumarhús Hreiðars Más

Óprúttnir aðilar köstuðu tómatsósu og sinnepi á sumarhús í eigu Hreiðars Más Sigurðssonar í Stykkishólmi í nótt. Að sögn varðstjóra lögreglunnar urðu engar skemmdir á húsinu. Auðvelt reyndist að þvo ófögnuðinn af veggjum hússins en það voru ættingjar eigandans sem sáu um þrifin.

Höfundur innstæðutrygginga: Ekki til krafa um að borga í tilskipuninni

Þingmaður Evrópuþingsins, og einn af höfundum tilskipunar um innstæðutrygginga sem var samþykkt árið 1994, Alain Lipietz, segir kerfið gallað og lagalegur grundvöllur Breta og Hollendinga sé veikur. Í sama streng tekur Michael Hudson, hagfræðingur frá Bandaríkjunum.

Hjartavernd fékk 125 milljónir í rannsóknarstyrk

Hjartavernd hefur nýverið fengið rannsóknastyrki frá Bandarísku heilbrigðisstofnuninni (NIH) til rannsókna á sambandi æðakerfis og heila- og nýrnastarfsemi sem og til rannsókna á notkun beinamynda sem munu spá fyrir um líkur á beinbrotum. Alls hlaut Hjartavernd 125 milljónir í styrki.

Björk vill annað sætið

Björk Vilhelmsdóttir, félagsráðgjafi og borgarfulltrúi, býður sig fram í 2. sæti á lista Samfylkingarinnar í prófkjöri flokksins sem haldið verður 30. janúar næstkomandi. Björk hefur átt sæti í borgarstjórn í átta ár þar sem hún hefur verið atkvæðamikil í velferðarmálum, auk þess að sitja í skipulagsráði og borgarráði.