Krónan veiktist um 2,75% í dag

Krónan náði sér ekki á strik eftir skarpa lækkun í morgun. Gengisvísitalan hækkaði um 2,75% og stóð í 123 stigum við lokun markaða. Þetta kemur fram í hálffimmfréttum KBbanka. Að öllum líkindum voru það fréttir af uppsögn skuldabréfa bankanna sem höfðu þessi áhrif á gengið og vógu þar þyngra en jákvæðar greiningar erlendra greiningardeilda sem birtust í dag.

Burðarþolið kannað

Hún var ekki stór í sniðum brúin sem mældist með mesta burðarþolið í brúarkeppni véla- og iðnaðarverkfræðinema við Háskóla Íslands sem haldin var í dag. Fjöldi nema tók þátt í keppninni sem er hluti af námi þeirra.

Utanríkisráðherra á faraldsfæti

Geir H. Haarde, utanríkisráðherra, hefur verið á faraldsfæti síðan fregnir af brotthvarfi Bandaríkjahers bárust í síðustu viku. Hann hefur nú rætt stöðu mála við starfsbræður sína í Frakklandi og Rússlandi og stefnan er næst tekin á Þýskaland.

7 mánuðir fyrir að bíta lögreglumann

Karlmaður á þrítugsaldri var dæmdur í 7 mánaða skilorðsbundið fangelsi fyrir að bíta lögreglumann til blóðs í höndina og hótað honum smiti af lifrarbólgu C, sem ákærði er smitaður af. Einnig var stefndi dæmdur til að greiða lögreglumanninum skaðabætur vegna ótta síðarnefnda um að hann hefði smitast af sjúkdómnum.

Áframhaldandi gæsluvarðhald yfir Nígeríumönnunum

Nígeríumennirnir tveir sem verið hafa í gæsluvarðhaldi frá því á föstudaginn síðasta voru nú síðdegis úrskurðaðir í áframhaldandi gæsluvarðhald til tveggja vikna. Mennirnir voru handteknir er þeir hugðust yfirgefa landið með hundrað þúsund evrur í peningum en þeir höfðu verið stöðvaðir við komuna til landsins deginum áður með búnað til peningafölsunar.

Viðskipaþvinganir mögulegar gegn Hvíta-Rússlandi

Leiðtogar Evrópusambandsríkjanna og Bandaríkjanna sammælast um að fordæma aðgerðir stjórnvalda í Minsk í nótt, þar sem yfir 200 mótmælendur voru handteknir á Októbertorginu. Leiðtogarnir segja hugsanlegt að viðskiptaþvingunum verði beitt vegna forsetakosninganna sem fram fóru síðastliðinn sunnudag, en gerðar hafa verið alvarlegar athugasemdir við framkvæmd kosninganna.

Vilja sjá öldrunarmálefni hjá sveitarfélögum

Samtökin 60+ í Hafnarfirði krefjast þess að málefni eldri borgara verði færð frá ríki til sveitarfélaga og að velferðarmál verði sameinuð undir einu ráðuneyti. Þetta kemur fram í ályktun sem samþykkt var á aðalfundi samtakanna síðastliðna helgi.

Fréttir úr Norðurhöfum

Nýr alþjóðlegur fréttavefur flytur fréttir og upplýsingar frá Barentshafinu. Vefgáttin er samstarfsverkefni norska ríkisútvarpsins NRK, sænska ríkisútvarpsins og TV Murman í Múrmansk. Norskir, sænskir og rússneskir blaðamenn skrá fréttir inn á vefinn daglega.

Forseti Íslands við útför Lennarts Meri

Forseti Íslands, Ólafur Ragnar Grímsson, verður viðstaddur útför Lennarts Meri, fyrrverandi forseta Eistlands á sunnudaginn. Meri er minnst í Eistlandi og víðar fyrir þrotlausa baráttu fyrir lausn Eystrasaltslandanna undan Sovétríkjunum. Hann var forseti Eistlands á árunum 1992 til 2001.

Leyfum fólkinu að koma til okkar

Frjálshyggjufélagið hvetur ríkisstjórn Íslands til að nýta ekki aðlögunarfrest vegna frjálsrar farar launafólks frá nýjum aðildarríkjum Evrópusambandsins. Þetta kemur fram í fréttatilkynningu frá félaginu. Aðlögunarfresturinn heimilar tímabundnar hömlur á aðgengi vinnuafls frá hinum nýju aðildarríkjum ESB að íslenskum vinnumarkaði.

Deilt um form aðgangs að íslenskum vinnumarkaði

Ágreiningur er uppi um hvort veita eigi launafólki frá nýjum aðildarríkjum Evrópusambandsins aðgang að íslenskum vinnumarkaði. Íslensk yfirvöld þurfa að taka ákvörðun í málinu innan fimm vikna.

Samkynhneigðir geta brátt skráð sig í sambúð í þjóðskrá

Ríkisstjórnin ákvað í morgun að verja einni og hálfri milljón króna til að fjármagna breytingar á grunnforritum Hagstofunnar svo hægt sé að skrá samkynhneigða í sambúð í þjóðskránni. Ráðgert er að kerfisbreytingunni verði lokið þegar frumvarp til laga um réttarstöðu samkynhneigðra verður að lögum.

Silvía lak

Myndband við evróvisjónlag Silvíu Nætur er komið út, - óformlega. Til stóð að frumsýna myndbandið í kvöld en, líkt og með lag Silvíu, lak myndbandið á netið fyrr en til stóð og gengur nú manna á millum.

Þyrlur verða fengnar á leigu

Óhjákvæmilegt er að leysa skort á þyrlukosti Landhelgisgæslunnar í tveimur áföngum, eftir að þyrlur varnarliðsins hverfa á brott fyrir septemberlok: Til bráðabirgða með leigu á þyrlum og nánu samstarfi við nágrannaþjóðir, og til langframa með kaupum eða leigu á nýjum þyrlum. Þetta kemur fram í tilkynningu sem dómsmálaráðuneytið sendi frá sér í dag.

Varnarsamstarfið rætt hér á landi eftir viku

Ákveðið hefur verið að viðræður milli Íslands og Bandaríkjanna um varnarsamstarfið fari fram í Reykjavík næstkomandi föstudag, 31. mars. Þetta kemur fram í tilkynningu sem utanríkisráðuneytið sendi frá sér fyrir stundu.

Sprenging í skóla í Frakklandi

Að minnsta kosti ein kona slasaðist alvarlega þegar mikil sprenging varð í háskóla í Mulhouse í Austur-Frakklandi í dag. Eldur logar í skólanum eftir sprenginguna en þar er efnafræðikennsla í hávegum höfð.

Krónan lækkar og hlutabréf í bönkunum

Gengi íslensku krónunnar hefur ekki verið eins lág og nú síðan um miðjan nóvember árið 2004. Krónan hefur lækkað um rúm þrjú prósent á síðastliðinni viku.

Æfa viðbrögð við Kötluvá

Almannavarnaæfingin Bergrisinn 2006 verður haldin um helgina en hún er lokahnykkurinn á gerð nýrra viðbragðs- og rýmingaráætlana fyrir áhrifasvæði eldgosa, jökuklhlaupa og gjóskufalls frá Mýrdals- og Eyjafjallajöklum. Mun verða látið reyna á alla þætti áætlananna, sem lúta að viðvörunum til íbúa, rýmingaráætlun, umferðar- og fjarskiptaskipulags, boðunaráætlun, samhæfingu o.fl.

Gljúfrasteinn opnaður á ný

Laxnes safnið að Gljúfrasteini hefur verið opnað á ný eftir gagngerar endurbætur. Verið er að klára eldhúsið en það hefur hingað til ekki verið til sýnis.

Leysa skuldabréf sín út

Talsmenn stóru bankanna segjast alltaf hafa gert sér grein fyrir því að peningamarkaðssjóðir í Bandaríkjunum kynnu að vilja innleysa skuldabréf sín í íslenskum bönkum fyrr en bankarnir hefðu vænst, eins og nú er að gerast.

Líklega áfram í gæsluvarðhaldi

Allar líkur eru á að krafist verði áframhaldandi gæsluvarðhalds yfir tveimur Nígeríumönnum sem handteknir voru á leið úr landi með yfir átta og hálfa milljón króna í reiðufé í síðustu viku. Talið er að um sé að ræða fjársvikamál sem tengist tölvupóstsendingum.

Moska súnní múslima sprengd

Óttast er að töluvert mannfall hafi orðið þegar sprengja sprakk við inngang að mosku súnní múslima í bænum Khalis norðvestur af Bagdad, höfuðborg Íraks, í morgun.

Rúmbotnar afturkallaðir

IKEA á Íslandi hefur afturkallað botna á barnarúmum af gerðinni Tassa eða Sniglar sem eru af stærðinni 55cm x 112cm, hafa verið seld frá því í ágúst 2005 og bera merkinguna "ID NO 15333" og "Made in Poland" á rúmbotninum.

Fimm íslensk fyrirtæki á nýjan vísitölulista

Fimm íslensk fyrirtæki komast inn á nýjan sameiginlegan vísitölulista kauphallanna í Reykjavík, Oslo, Stokkholmi, Kaupmannahöfn og Helsinki, sem stofnaðir verða upp úr næstu mánaðamótum.

Yfirtökutilboð Dagsbrúnar í Wyndeham Press Group

Dótturfélag Dagsbrúnar, Daybreak Acquisitions Limited (Daybreak), hefur gert öllum hluthöfum í breska prent- og samskiptafyrirtækinu Wyndeham Press Group (Wyndeham) yfirtökutilboð á 155 pens á hlut. Samkvæmt tilboðinu er fyrirtækið metið á um 80,6 milljónir punda. Meðfylgjandi er opinber tilkynning sem birt var í Kauphöllinni í London (LSE) varðandi yfirtökutilboðið.

Hæstiréttur þyngdi dóm yfir frönskum manni

Hæstiréttur þyngdi í gær dóm yfir frönskum manni sem tók dóttur sína frá barnsmóður sinni og fór með hana til Frakklands árið 2001 og hélt henni þar.

Fuglaflensa í kalkúnum í Jórdaníu

Staðfest var í morgun að hið hættulega H5N1 afbrigði fuglaflensu hefði greinst í fuglum í Jórdaníu. Flensan hefur ekki greinst í fólki þar.

Andspyrnumenn felldir í Pakistan

Pakistanskar öryggissveitir felldu í morgun um tuttugu vígamennn í átökum í Norður-Wasiristan héraði í Pakistan. Nokkuð hefur verið um átök á svæðinu síðustu mánuði.

Keppni í kynþokka á Vestfjörðum

Leitin af kynþokkafyllasta Vestfirðingnum stendur nú yfir en 60 einstaklingar hafa fengið tilnefningu. Á fréttavefnum Bæjarins besta segir að eftir helgi verði tilkynnt hvaða fimm karlar og fimm konur hafa hlotið flestar tilnefningar og verður kosið á milli þeirra.

Mun fleiri konur atvinnulausar á Vestfjörðum

Konur eru í miklum meirihluta atvinnulausra á Vestfjörðum samkvæmt tölum Vinnumálastofnunar. Á fréttavefnum Bæjarins besta segir að 62 konur og tíu menn séu á atvinnuleysisskrá en atvinnulausum karlmönnum hefur fækkað úr 17 frá því í byrjun mars.

Aðgerðaráætlun fyrir Langjökul

Slysavarnafélagið Landsbjörg, Ríkislögreglustjóri og lögreglustjórarnir í Árnes-, Húnavatns- Borgarfjarðar og Mýrasýslum undirrituðu í gær aðgerðaráætlun fyrir Langjökul. Tilgangur hennar er að gera allt leitar-og björgunarstarf markvissara með því að ákveða fyrirfram boðun björgunarsveita, stjórnun og leitarskipulag.

Tilboð hærri en búist var við

Tilboð frá aðal miðlurum voru hærri en búist var við og hærri en tilboð á eftirmarkaði þegar útboð Lánasýslu ríkisins fór fram á miðvikudag, og því ákvað Lánasýslan að hafna öllum tilboðum að þessu sinni, segir í tilkynningu frá Lánasýslunni.

Sinueldur við Hafravatnsveg

Kveikt var í sinu við Hafravatnsveg í Reykjavík í gærkvöldi og logaði glatt þegar slökkvilið kom á vettvang. Nokkurn tíma tók að slökkva eldinn endanlega, en slökkviliði tókst að fljótt að hefta útbreiðslu eldsins.

Á heimleið með fullfermi af kolmunna

Tvö íslensk fjölveiðiskip eru nú á landleið af Írlandsmiðum með yfir tvö þúsund tonn af kolmunna hvort skip en heimsiglingin tekur að minnsta kosti tvo sólarhringa. Kolmunninn er nú á norðurleið inn í færeysku lögsöguna og eru vonir bundnar við að hann gangi svo í miklum mæli inn í íslensku lögsöguna í vor.

Króuðu kófdrukkinn ökumann af

Lögreglumenn á þremur bílum náðu að króa af og stöðva kófdrukkinn ökumann sem reyndi að stinga lögregluna af eftir að hann hafði mælst á rösklega hundrað kílómetra hraða á Sæbraut í nótt.

Danskur hermaður lét lífið í Írak

Danskur hermaður lét lífið í Írak í gær eftir að vegsprengja sprengdi ökutæki sem hann var í. Annar hermaður særðist í sprengingunni. Þetta er þriðji danski hermaðurinn sem lætur lífið í stríðinu í Írak.

Enginn mun ná meirihluta

Kosningabaráttan í Úkraínu er nú í algleymingi fyrir kosningarnar sem fram fara í landinu um helgina. Samkvæmt nýjustu könnunum mun enginn flokkur ná meirihluta í kosningunum.

Átök milli lögreglu og óeirðalögreglu

Til átaka kom milli mótmælenda og óeirðarlögreglu í París í gær og í nótt þegar mótmæli héldu áfram gegn nýrri vinnulöggjöf í Frakklandi. Mótmælendur segja lögin auðvelda atvinnurekendum að segja upp ungu fólki.

200 mótmælendur handteknir í Hvíta-Rússlandi

Um tvö hundruð mótmælendur voru í nótt handteknir í Minsk í Hvíta-Rússlandi. Mótmælendurnir hafa hafst við í tjöldum á torgi í miðborginni síðustu daga til að mótmæla úrslitum forsetakosninganna þar í landi á sunnudaginn.

Sögðu upp skuldabréfum íslensku bankanna

Peningamarkaðssjóðir í Bandaríkjunum hafa sagt upp fimm ára skuldabréfum sem þeir hafa keypt af íslenskum viðskiptabönkum fyrir hátt í hundrað milljarða króna.

Leiði til þess að menn fari betur með vald sitt

Helga Jónsdóttir, fyrrverandi borgarritari, vonast til þess að álit umboðsmanns Alþingis þess efnis að ekki hafi legið nægilega faglegar ástæður að baki ráðningu í starf ráðuneytisstjóra félagsmálaráðuneytisins fyrir um tveimur árum, verði til þess að menn fari betur með það vald sem þeim sé falið. Hún hefur ekki ákveðið hvort hún ætlar að leita réttar síns vegna málsins.

Tekinn innanbæjar á 123km hraða

Nítján ára drengur var tekinn á 123 kílómetra hraða á Selfossi í kvöld. 50 kílómetra hámarkshraði er í Langholtinu þar sem hann var stöðvaður og má hann því eiga von á tafarlausri ökuleyfissviptingu og háum sektum.

Ráðherrar ræddu veiðar og tolla

Hvalveiðar, sjóræningjaveiðar og verndartollar Evrópusambandsins voru meðal umræðuefna þegar Einar K. Guðfinnsson hitti Ben Bradshaw, sjávarúvegsráðherra Breta í Lundúnum í dag.

Krefjast kennitölu við sölu á gjaldeyri

Persónuvernd hefur komist að þeirri niðurstöðu að það samræmist ekki alltaf lögum um persónuvernd og meðferð persónuupplýsinga að bankar krefjist skilríkja og kennitölu þegar keyptur er gjaldeyrir. Hins vegar geti það verið réttlætanlegt málið snýst um háar fjárhæðir.

Framkvæmdir við hæsta hús á Íslandi ganga vel

Framkvæmdir við hæsta hús á Íslandi ganga vel, en það mun rísa við Smáratorg í Kópavogi, húsið verður 78 metrar á hæð og áætlað er að reisa fleirri stórbyggingar á svæðinu.